 |
Тĕнче чĕрĕлнĕ вăхăтра кун çути курнă пулсан та тулăх кĕркуннене кăмăллать Ольга Степановна. Кил хушшинче кулленхи ĕçсемпе тăрмашнă май çут çанталăк илемĕпе киленсе илме те вăхăт тупать вăл. Сисмесĕрех хăй мĕн пĕчĕкрен юратакан Александр Пушкин поэтăн пурте пĕлекен йĕркисем пуçа кĕреççĕ. Юратать вăл вырăс классикĕсен сăввисемпе повеçĕсене, романĕсене. Килти ĕçсене пуçтарсан тирпейленчĕ те инçех мар вырнаçнă шкула утрĕ. Васкамасăр, шухăшлăн. Хăй юратса суйласа илнĕ учитель сукмакне 30 çул такăрлатать вăл. Мĕн пĕчĕкрен вĕрентекен пулас ĕмĕтпе çунатланнăран Комсомольски районĕнчи Çĕнĕ Кипеçри вăтам шкула пĕтерсенех Шупашкарти педагогика институтне çул тытрĕ. Вырăс чĕлхипе литературине тарăнрах алла илес, унтан мĕн пĕлнине ачасене вĕрентес, ял ачисем вырăсла та тăван чĕлхе пек таса та илемлĕ, тĕрĕс калаçтарас, çыртарас килчĕ унăн. Ача чухне мĕн ĕмĕтленен - ỹссен çав пулать тени тĕрĕсех. Паянхи ачасене ĕлĕкхипе пачах танлаштарма çук. Ара, утмăлмĕш-сакăр вуннăмĕш çулсен пуçламăшĕнче ялтан инçех тухса курман чăваш ачисене вырăсла калаçма çăмăл марччĕ. Вĕренекенсен чĕлхине "вырăслатас" тесе сахал мар тăрăшма тиветчĕ педагогсен. Урокра кăна мар, ун хыççăн тата мĕн чухлĕ ларман пулĕ. Халĕ тем тесен те çăмăлтарах. Вĕт-шакăр вырăсла ăста пуплет. Юратнă вĕрентекене пиллĕкмĕшсем ăшшăн кĕтсе илчĕç. Уроксем пуçланиччен класс руководителĕ кашни ачана куçпа пăхса çаврăнчĕ, пурте вырăнта-и, сывлăхлă-и? Тин çеç тĕрлĕ учительсене хăнăхса пыракансемшĕн Ольга Степановна иккĕмĕш амăшĕ вырăнĕнче. Кашни савăнăçлă саманта, çĕнĕлĕхсене пĕрле пайлаççĕ шăпăрлансем. Ертỹçĕ вĕренекенсене уроксенче лайăх паллăсем илме сунса учительсен кабинетне савăнăçлăн утрĕ. Куна мĕнле кăмăлпа пуçлатăн, çапла вĕçлетĕн. Çавăнпа та сỹрĕкленме юратмасть, савăк кăмăлпа класа кĕрет. Пĕрремĕш урок саккăрмĕшĕнче. Хăйĕн предмечĕсене тĕплĕ пĕлет пулсан та уроксене чĕрĕлĕх кĕртессишĕн, çĕнĕлĕхсемпе усă курассишĕн ăнтăлать Ольга Дмитриева. Çавăнпах компьютер умĕнче сахал мар ларать. Хăйĕн сайтне те уçнă. Çĕнĕ методикăпа паллашсах тăрать. Кĕнеке вуламасăр пĕр кун та иртмест унăн. О.Дмитриева хăйĕн пĕлĕвне, тавра курăмне ỹстерсех пырать. Тĕрлĕ конкурс-тупăшусене хутшăнать. Вĕренекенсене те конкурссенчен тăратса хăвармасть. Районти наукăпа практика конференцийĕсенче, республикăри дистанци олимпиадисенче, тĕрлĕ конкурссенче, вăйăсенче унăн вĕренекенĕсем яланах малти вырăнсене çĕнсе илеççĕ. Юлашки виçĕ çулта кăна вăл ертсе пынипе 10 вĕренекен шкул ачисен Раççей, республика, район шайĕнчи конкурссенче палăрчĕ. "Русский медвежонок - языкознание для всех" вăйă-конкурсра шкулта вĕренекен ачасенчен çурри ытла тупăшать. Шкулта вырăс чĕлхипе тата литературипе иккĕмĕш çула юлакансем пачах çук. Ольга Степановна хăй ытларах кроссвордпа кăсăкланать те, ачасене те çак вăйăпа интереслентерет. Усси пурах, тăхтав вăхăтĕнче унăн вĕренекенĕсем ахаль ларасшăн мар, кроссвордпа аппаланаççĕ. Тупсăмне тупаймасан юратнă вĕрентекенĕнчен пулăшу ыйтаççĕ. Класс тулашĕнчи ĕçсенче те вĕренекенсемпе диспутсем ирттерме кăмăллать. Вăл ертсе пыракан кружока çỹрекенсем сăвă çырма юратаççĕ. Пĕлтĕрхи "Ради жизни на земле" районти конкурсра унăн вĕренекенĕ пĕрремĕш вырăна çĕнсе илнĕ çĕрте, паллах, вырăс чĕлхипе литературине вĕрентекенĕн тỹпи пысăк. Ольга Степановна çирĕм çула яхăн директорăн вĕренỹ енĕпе ĕçлекен çумĕнче тăрăшрĕ. Çак тапхăрта çамрăк педагогсене çăмăл мар ĕçре сахал мар пулăшрĕ, ырă сĕнỹ-канаш пачĕ. Халĕ те вăл шкулти учительсен методика пĕрлешĕвĕн руководителĕ. Ашшĕ-амăшĕ, районти учительсем умĕнче йĕркелекен уçă уроксем интереслĕ те кăсăклă иртеççĕ. Ĕнерхи вĕренекенĕсем яла килмессерен ăна тĕл пулса тав тăваççĕ, вырăс чĕлхине лайăх пĕлни пурнăçра кирлĕ иккенне пĕлтереççĕ. Студентсене те май килнĕ таран пулăшма хатĕр, кирек кама та пулăшу аллине тăсать. Хисеплеççĕ коллективра сăпайлă та пултаруллă вĕрентекене. Сас хăпартса курман, яланах пулăшма хатĕр, ырă сунакан, чапшăн, наградăшăн çунман, ачасене юратакан, вĕсене тарăн пĕлỹ парассишĕн чунне паракан учительницăна кăçал Чăваш Республикин Патшалăх Канашĕн Хисеп грамотипе чысларĕç. Районти педагогсем умĕнче çапла чыс туни пысăк хисеп пулчĕ уншăн. Анчах та халĕччен унран пысăк награда та илсе курман вăл. Ольга Степановна ял пурнăçĕнчен те аякра тăрса юлмасть. Ялта экологи субботникĕ ирттермелле е суйлав умĕнхи кампание хутшăнса агитатор пулмалла... яланах халăх хушшинче хăйĕн ĕçне лайăх пĕлекен профессионал-учитель. Кун каç енне сулăннă. Ольга Степановна кунĕпе ларса канайман пулсан та ывăннине туймасăр килелле вашаватлăн утать. Унта вара савнă мăшăрĕ, тăван киле канмалли куна килнĕ ытарайми виçĕ ачи кĕтеççĕ. |