Публикации » Халăхпа курнăçаççĕ

Тĕмерте иртнĕ граждансен пухăвĕнче пĕлтĕрхи ĕç-хĕле пĕтĕмлетнĕ, малашнехи тĕллевсене палăртнă. Кăçал Аслă Çĕнтерỹ тунăранпа 65 çул çитет. Çак пысăк пĕлтерĕшлĕ уява пĕлтĕрех хатĕрленме пуçланă Тĕмерсем _ Аттелĕхĕн Аслă вăрçинче пуçĕсене хунă ентешсене асăнса лартнă палăка тĕпрен юсанă. Юсав ĕçĕсен тăкакĕ 24500 тенкĕпе танлашнă. Кунта, паллах, ялти хăш та пĕр çынсем спонсор пулăшăвĕ панă. Ял халăхĕ Н.Муллинпа В.Федорова, юсав ĕçне пурнăçлама хутшăннă М.Васильева, пулăшу аллине яланах тăсса паракан "Труд" хуçалăх ертỹçине В.Германова тата ыттисене те пысăк тав сăмахĕ калать. Иртнĕ çул пурнăçланă пысăк ĕçсен шутне саккунсăр майпа уçнă çỹп-çап вырăнĕсене тасатнине, Тĕп урама вак чул сарма пуçланине, стадион уçнине кĕртмелле. Пурнăçламалли ĕçсем тата та чылай-ха. Кăçал йăлара пухăнакан çỹп-çапа Елчĕкри свалкăна леçессине йĕркелемелле. Çак ĕçе пурнăçлама ял тăрăхĕ "Слава картофелю" _ Яльчики" агрофирмăпа пĕрле МТЗ-80 трактор туянас кăмăллă. Çỹп-çапа турттарассинче тăкаксем те сахал мар пулĕç. Вĕсене саплаштарас тĕллевпе самообложени укçине 50 тенкĕрен 200 тенкĕ таран хăпартма килĕшрĕ халăх. Малалла юпа уйăхĕнче иртекен суйлава, халăх çыравне хатĕрленес, пушар машинине тытса тăрас, ытти ыйтусем çинче чарăнса тăчĕç пухăннисем. Пуху вĕçĕнче Çирĕклĕ Шăхаль ял тăрăхĕн пуçлăхĕ Л.Кошкин В.Д.Петрова трибуна умне йыхравларĕ. Обществăлла ĕçсене хастар хутшăннăшăн, "Знамя", "Труд" хуçалăхсенче тĕп зоотехникра ĕçлесе ыттисемшĕн яланах тĕслĕх пулнăшăн "Çирĕклĕ Шăхаль ял тăрăхĕн хисеплĕ гражданинĕ" ята тивĕçрĕ Виталий Деомидович.  Сăн ỹкерчĕкре:В.Петрова чысланă самант.