Публикации » Экономикăри преступленисене хирĕç

 Юлашки çулсенче экономикăри преступленисем ỹсни сисĕнет. Мĕнпе сăлтавламалла çакна? Чи малтанах çĕршыври экономика лару-тăрăвĕ тивĕçлĕ шайра маррине асăнмалла. Тĕнчере хуçаланакан финанс кризисĕ çак лару-тăрăва тата кăткăслатрĕ. Чăваш Енре экономикăри преступленисемпе кĕрешессине вăйлатас тĕлĕшпе 2006 çулта ШĔМĕн экономика преступленийĕсемпе кĕрешекен оперативлă шырав пайĕсене туса хучĕç. Патăрьел, Комсомольски, Шăмăршă тата Елчĕк районĕсене тивĕçтерекен асăннă пай Комсомольскинче вырнаçнă. 2009 çулта Елчĕк районĕнче экономика енĕпе 17 преступлени тунине тупса палăртнă (иртнĕ çул 12 преступлени). Çак шутран иккĕшĕ йывăр тата уйрăмах йывăррисен шутĕнче. Вĕçленнĕ ĕçсемпе çыхăннă тăкаксен виçи пурĕ 219 пин тенкĕпе танлашнă, ăна йăлтах саплаштарнă. 17 преступленирен тĕслĕх вырăнне илсе кăтартмалли сахал мар. Сăмахран, районти пĕр предприятин конкурслă управляющийĕ шутланакан М. должность полномочийĕпе иртĕхсе усă курнă. Федерацин "Панкрута тухни çинчен" Саккунне хирĕçлесе парăмĕсене татайманнине пĕлсе тăрсах предприятие ăнăçлă ĕçленĕ пек кăтартса суя документсем хатĕрленĕ, предприяти пурлăхне залога хывса 2,4 миллион тенкĕлĕх заем илнĕ. Çавна май предприятинчи лару-тăрăва тата та кăткăслатнă, унăн кредиторла парăмĕ 1,5 миллион тенкĕ таран ỹснĕ. Саккуна пăхăнманшăн М. Раççей Федерацийĕн Уголовлă Кодексĕн 201 статйин 1 пайĕпе килĕшỹллĕн явап тытать. Тепĕр учрежденин директорĕ П. та должность полномочийĕпе усă курса преступлени çулĕ çине тăнă. Суд ăна Раççей Федерацийĕн Уголовлă Кодексĕн 285 статйин 1, 160 статйин 3 пайĕсемпе килĕшỹллĕн айăпланă.