20 июля 2016 г.
Аслă Елчĕкри Ленин ячĕллĕ ялхуçалăх предприятийĕпе В.Чернов фермер /хресчен/ хуçалăхĕнче вырма ĕçĕсене пурнăçлас, выльăх-чĕрлĕх отраслĕн кăçалхи çур çулти ĕç кăтартăвĕсене пĕтĕмлетес енĕпе районти семинар-канашлу иртрĕ. Унăн ĕçне ял тăрăхĕсен пуçлăхĕсем, ялхуçалăх предприятийĕсемпе хресчен /фермер/ хуçалăхĕсен ертÿçисем, специалистсем хутшăнчĕç. Канашлăва район администрацийĕн пуçлăхĕ Н.Миллин ертсе пычĕ тата пĕтĕмлетрĕ.
Ленин ячĕллĕ хуçалăх В.Падуев ертÿçĕ, Аслă Елчĕк ял тăрăхĕн пуçлăхĕ В.Афанасьев тăрăшнипе юлашки çулсенче ăнăçлă аталанса пырать. Кунта çитĕнтерекен ялхуçалăх культурисен уйĕсенче йĕркелĕх хуçаланать: уй-хирте çум курăк кураймăн, тухăç та пысăк пуласса шантарать.
Кунпа çеç лăпланса лармаççĕ Аслă Елчĕксем: çулсеренех вырмана хутшăнакан тĕрлĕ техника хатĕрĕ туянаççĕ, тырă типĕтмелли, упрамалли агрегатсене, складсене йĕркене кĕртеççĕ. Акă, кунта ялхуçалăх культурисене çулакан КСУ-1 йышши хăй тĕллĕн çÿрекен косилка туяннă. Сăмах май, çакăн йышши агрегатсем хальлĕхе районта 6 хуçалăхра çеç пур. Техникăн çĕнĕ, хальхи йышши хатĕрĕсем ĕç хăвăртлăхне ÿстерме май параççĕ.
Семинар-канашлăва хутшăннисем вырмана хутшăнакан, кĕрхи çĕртме сухи тăвакан, кĕрхи культурăсем акма çĕр хатĕрлекен, акакан агрегатсемпе, йĕтем хуçалăхĕпе паллашрĕç.
Семинар-канашлăвĕн теори пайĕ Аслă Елчĕкри культура çуртĕнче иртрĕ. Пухăннисен умĕнче тĕп докладпа район администрацийĕн ялхуçалăх пайĕн ертÿçи П.Тремасов тухса калаçрĕ.
Кăçалхи вырмари ĕç калăпăшĕ самаях пысăк. Ялхуçалăх предприятийĕсенче, хресчен /фермер/ хуçалăхĕсенче пĕрчĕллĕ тата пăрçа йышши культурăсене 21473 гектар çинчен пухса тĕшĕлемелле. Çакна пурнăçлама 81 комбайн, çав шутра ялхуçалăх предприятийĕсенче 45 комбайн хутшăнмалла. Пĕр комбайн пуçне тивĕçекен ĕç калăпăшĕ районĕпе вăтамран 264 гектарпа, ялхуçалăх предприятйĕсенче - 320, хресчен /фермер/ хуçалăхĕсенче 196 гектарпа танлашать. Вырмара çĕнĕ йышши комбайнсемпе ытларах усă курни вырăнлă. Ленин ячĕллĕ, «Рассвет», «Комбайн», «Сатурн» ЯХПКсен, «Прогресс» АХОн, «Урожай», «Победа», «Яманчурино» ОООсен тĕслĕхне тĕпе хурса районти ытти хуçалăхсенче те техника паркне çĕнетесси çинчен шухăшламалла, тимлемелле. Çакă тыр-пула кĕске вăхăтра, пысăк пахалăхпа, çухатусăр пуçтарса илме май парать. Унсăр пуçне уй-хирти кĕрхи ĕçсене пурнăçлама, кĕрхи культурăсене акма çĕр хатĕрлеме, вĕсене акма, кĕрхи çĕртме сухи тума та вăхăта перекетлет.
Вырма ĕçĕсене пурнăçланă чухне технологине тĕрĕс суйласа илмелле. Чи пахалăхли, паллах, ялхуçалăх культурисене уйрăмшарăн пухса кĕртни. Тыр-пула малтан çулса типĕтес, унтан пухса çапас тĕллевпе «Победа», «Яманчурино» ОООсем, «Прогресс» АХО, «Комбайн», Ленин ячĕллĕ, «Рассвет» ЯХПКсем «КСУ-1» йышши жаткăсем туяннă. Çак хуçалăхсен ертÿçисем çав технологипе усă курса йĕтеме тырă типĕ кĕнине, сутлăх хакĕ пысăк пулнине питĕ лайăх ăнланаççĕ. Шел, хăш-пĕр хуçалăхсен ертÿçисем çунтармалли-сĕрмелли материалсене перекетлес тесе тĕш тырра тÿррĕн çапса тĕшĕлесси çине тимлĕх уйăраççĕ. Район администрацийĕн пуçлăхĕ Н.Миллин çак меслетпе сахалрах усă курма кирлине палăртрĕ. Çавăн пекех хуçалăхсенче тыр-пула йĕтем çинченех сортласа, тасатса, типĕтсе кĕртмелли çинчен те тепĕр хут аса илтерчĕ. Çавăнпа тырă типĕтекен комплекссене çĕнетмелле.
Кĕрхи культурăсене планпа килĕшÿллĕн 6,2 пин гектар çинче акса хăварма, çитес çулхи тухăçшăн 22,2 пин гектар кĕрхи çĕртме сухи туса хăварма палăртнă.
Семинар-канашлура выльăх-чĕрлĕх отраслĕн аталанăвне те тишкерчĕç.
Кăçалхи çур çулта районти хуçалăхсенче 1555,7 тонна аш-какай, 16407,4 тонна сĕт туса илнĕ. Мăйракаллă шултра выльăхсен йышĕ 14162 пуç таран, е пĕлтĕрхи çак вăхăтринчен 5 процент ытларах ÿснĕ, çав шутран сăвăнакан ĕнесем 5887 пуçпа танлашнă. Çакă та пĕлтĕрхинчен 3 процент ытларах.
Мăйракаллă шултра выльăхсене ÿт хуштарас енĕпе «Труд», «Кушкă», «Рассвет» ЯХПКсем, «Эмметево», «Яманчурино» ОООсем, сыснасене ÿт хуштарассипе «Прогресс» АХО, «Колос», «Комбайн» ЯХПКсем ăнăçлă ĕçленĕ.
Кăçалхи 6 уйăхра районти ялхуçалăх организацийĕсенче 1893, е иртнĕ çулхи çак вăхăтринчен 149 пуç ытларах пăру илнĕ. Кунта «Яманчурино», «Победа» ОООсенчи, «Прогресс» АХОри, Ленин ячĕллĕ ЯХПКра ĕçлекенсем хастар.
Сысна çури илессипе «Прогресс» АХО, «Колос», Ленин ячĕллĕ, «Комбайн» ЯХПКсем ăнăçлă ĕçленĕ.
Семинар-канашлура районти выльăх-чĕрлĕх отраслĕн ветеринари ăнăçлăхĕ çинчен районти выльăх-чĕрлĕх чирĕсемпе кĕрешекен станцин ертÿçи И.Николаева, Канашри элеватор директорĕ Л.Яковлева, «Восток» ООО директорĕ Л.Смирнова тухса калаçнă, районти ялхуçалăх предприятийĕсемпе хресчен /фермер/ хуçалăхĕсене пĕрле, тачă çыхăнса ĕçлеме чĕннĕ.
А.КАРЛИН.
Сăнÿкерчĕкре: Семинар-канашлу вăхăтĕнчеĕ
Источник: "Елчĕк Ен"