27 апреля 2016 г.
Ленин ячĕллĕ ялхуçалăх производство кооперативĕнче кăçал районта пуринчен те маларах пĕрчĕллĕ тата пăрçа йышши культурăсене акма тухнă.
Уй-хирти ĕçе малтанхи кунсенчен тытăнсах чăрмавсăр, тухăçлă йĕркелесе пынин тĕп вăрттăнлăхĕ - агротехникăна шута илсе çуракине ирттерме тĕплĕн хатĕрленни. Çĕр мĕнле пиçсе çитнине кура 50 гектар йышăнакан анара Виталий Долгов механизатор иртнĕ эрнерех урпа акса хăварнă. Хăйне пулăшма çирĕплетнĕ Владимир Долгов, Эдуард Волков сеяльщиксемпе тата Анатолий Арбузов водительпе ун хыççăнах вăл 85 гектар çинчи лаптăка куçнă. Кунта элита репродукцири «Экада-70» сортлă çурхи тулă акса хăвармалла.
Ака ĕçĕсене пурнăçланă çĕрте шанчăклă ялхуçалăх техникипе усă кураççĕ. МТЗ йышши икĕ тракторпа СЗ-5,4 сеялкăсем те çĕнĕ. Сăмах май, тепĕр ака агрегатне Владимир Майков ĕçлеттерет, Аркадий Кантеевпа Владимир Мольков сеяльщиксем, Олег Патшин водительсем пулса тăрăшаççĕ. Ялхуçалăх предприятийĕнче кашни ĕçе вĕçе-вĕçĕн - кал-кал йĕркелесе пыраççĕ. Петр Патшин кĕрхи çĕртме лаптăкĕнче нÿрĕк тытать, Виталий Хушкин çĕре кăпкалатать, ун хыççăнах анасене акакан агрегатсем йышăнаççĕ. Олег Патшин акнă лаптăксене пусăрăнтарать. Çапла майпа черетлĕ çуракири шутлă кунсемпе усă курса механизаторсен пĕрчĕллĕ тата пăрçа йышши культурăсене 810 гектар, пĕр çул тата нумай çул ÿсекен курăксене пурĕ 300 гектар, 60 гектар куккурус акса хăварма ĕлкĕрмелле.
Ака ĕçĕсене пурнăçланипе пĕр вăхăтрах 400 гектар йышăнакан, хĕл сиввисене тÿсĕмлĕн чăтса ирттернĕ кĕр тыррисен лаптăкĕсене минераллă удобренисемпе апатлантарасси çине те пысăк тимлĕх уйăраççĕ.
Светлана АРХИПОВА.
Автор сăнÿкерчĕкĕнче: Валерий Падуев председательпе Сергей Волков тĕп агроном Виталий Долгов механизаторпа Эдуард Волков, Владимир Долгов сеяльщиксене /сылтăмран сулахаялла/ канаш тума самантлăха ĕçрен чăрмантарнă самант.
Источник: "Елчĕк Ен"