Публикации » "Чăнкă кукаçи, пултаруллă асатте"

ятпа Аслă Елчĕкри культура çуртĕнче З.Кантеева тăрăшнипе тĕлĕнмелле кăсăклă конкурс йĕркелесе ирттернĕ. Конкурсра чи пултарулли Петр Александрович Горшков пулчĕ. Вăл Елчĕкри тĕп больницăра водительте ĕçлесе тивĕçлĕ канăва тухнă, чăннипех те пур енĕпе пултаруллă. Тĕрлĕ номинацире хакларĕç жюри членĕсем кукаçисемпе асаттесен пултарулăхне. "Чи сăпайли" ята Виталий Петрович Убасев, "Чи вăйли" Владимир Андреевич Мурзаков, "Спортпа тусли" Василий Алексеевич Чернов, "Чи савăнăçли" ята Анатолий Логинович Убасев çĕнсе илчĕç. Хĕсметри кăсăклă самантсене аса илни, винегрет хатĕрлесси, тĕл пересси тата ытти конкурссенче кукаçисемпе асаттесем пĕри тепринчен ăста пулни палăрчĕ. Конкурсантсем сцена çинче çухалса каймарĕç, ял çыннисемшĕн тĕлĕнмелле кану каçĕ ирттерме пулăшрĕç. Конкурсра юрă, ташă, шỹтсем тыткăна илчĕç. Курма килнисем пурте кăмăллă пулчĕç.