03 октября 2013 г.
2008 çулхи ака уйăхĕн 30-мĕшĕнче «Ĕç пенсийĕн пухăнса пыракан пайĕн страховани хушма взносĕсем тата пенси пухăнакан пайне патшалăх йĕркелеме пулăшни çинчен» федераци саккунĕ вăя кĕнĕччĕ. Пенсин патшалăх софинансировани программине хутшăнас текенсен заявлени çырмалли тапхăр вĕçлениччен шутлă кунсем юлчĕç: саккун тăрăх - 2013 çулхи юпа уйăхĕн 1-мĕшĕччен.
Страховани хушма взносĕсене тÿлеме каярах ыйту çырсан та май пур, анчах ун пеккисен взносĕсене инвестицилеме патшалăх хутшăнмĕ.
Çак кунсенче асăннă Программа ĕçлеме пуçланă хыççăнхи пĕрремĕш пĕтĕмлетÿсене тишкерме республикăри тĕрлĕ ведомство представителĕсем пресс-конференцие пухăнчĕç. Вăл Раççей Федерацийĕн Президенчĕн Чăваш Республикинчи йышăну пÿлĕмĕнче иртрĕ.
Пенсие йĕркелес ĕçе патшалăх хутшăннин программине вăя кĕртнĕренпе Раççей Федерацийĕпе 14 миллион заявлени йышăннă, çав шутра Чăваш Республикипе - 181,2 пин. Çакă республикăра пурăнакансен 14 проценчĕпе танлашать. Программăна хутшăнма кăмăл тунисен 50 проценчĕ - 40 çула çитменнисем, пенсионерсем - 14 процент. Хулара пурăнакансем ку ĕçре хастартарах пулни палăрать.
- Программа хута кайнăранпа Чăваш Енри МИХсем ăнлантару ĕçне анлăн йĕркелесе пычĕç, - терĕ ЧР информаци политикипе массăллă коммуникацисен министрĕн çумĕ Любовь Шемарина. - Вĕсенче 5000 ытла материал кун çути курчĕ, коллективсенче 4,5 пин семинар е тĕл пулу иртрĕ. Чăваш Республикин профсоюз йĕркеленĕвĕсен пĕрлешĕвĕпе пулнă килĕшÿ картинче пĕрлехи 117 мероприятире 2 пин ытла çынна Программа пирки тĕплĕн ăнлантарса панă. Çамрăк ăрăва та анлă ыйтупа кăсăклантарма май килчĕ. 2012 çулта республикăра йĕркеленĕ «Манăн шухăш» сочиненисен конкурсне аслă класра вĕренекен 310 ача, аслă пĕлÿ паракан тĕрлĕ учрежденире ăс пухакан 134 студент хутшăнни çакна çирĕплетет. «Манăн пулас пенси» темăпа кăçал ака уйăхĕнче олимпиада та иртрĕ.
Софинансировани программине хутшăнма кăмăл тунă ĕç паракансемшĕн саккунпа килĕшÿллĕн налук тÿлессипе çăмăллăхсем кÿмешкĕн йышăннă. Эппин, тĕрлĕ ĕçпе аппаланакан ертÿçĕсемшĕн ку çĕнĕлĕх ырă енĕпе çеç палăрĕ. Программа конкуренци пур ĕçре чи маттуррисене, тÿрĕ кăмăлпа тăрăшакансене тытса тăма пулăшĕ. Çакăн çинчен каларĕ пресс-конференцире Чăваш Республикин Суту-илÿпе промышленноç палатин президенчĕ Игорь Кустарин. Анлă Программа хальлĕхе кирлĕ пек хăвăрт пурнăçа кĕрсе пыманнине те палăртрĕ. Ĕçе вăйлатма социаллă партнерсене тачăрах çыхăнма сĕнчĕ.
РФ Пенси фончĕн Чăваш Республикинчи управляющийĕ Роза Кондратьева Программа çинчен пĕтĕмĕшле каласа кăтартрĕ, унăн япăх енĕсем çуккине аса илтерчĕ. Роза Алексеевна ĕнентернĕ тăрăх - Программăна кĕме ыйтса çырнисенчен чылайăшĕ хальлĕхе страховани хушма взносĕсене тÿлеме васкамасть-мĕн. Республикипе илсен взноссен пĕтĕмĕшле сумми 376,3 миллион тенкĕпе танлашать.
Пухăнса пыракан укçана Раççей Пенси фончĕ кăна мар, патшалăхăн мар пенси фончĕ те тÿлеме пултарнине аса илтеретпĕр. Ăна гражданин хăй суйлать. Патшалăхăн мар пенси фончĕсен адресĕсене, телефон номерĕсене Интернетра шыраса тупма май пур е Раççей Пенси фончĕн талăкĕпех ĕçлекен тÿлевсĕр 800-510-55-55 телефонĕпе шăнкăравлама пулать.
Хăвăрăн пенси капиталне ÿстерес тетĕр-и? Эппин, Программăна хутшăнма кăмăл пурри çинчен ыйтса çырма васкăр! Авăн уйăхĕн 30-мĕшĕ - заявлени йышăнмалли юлашки кун. Предпринимательсемшĕн, вахтовиксемшĕн, килте ларакансемшĕн... - яланхи ĕç укçи илсе тăманнисемшĕн - патшалăхăн ку программи - чăн-чăн шанăç. Алăри кайăка ан вĕçертĕр кăна.
Ирина ИВАНОВА
Источник: "Хыпар"