Публикации » Купăс кĕввипе, шăнкăрав сассипе...

МАРТĂН 8-мĕшĕнче Кивĕ Чукалта пурăнакансем сивĕ Хĕле хаваслăн ăсатса ячĕç.

Уява уçса, ял тăрăхĕн пуçлăхĕ Александр Чамеев хĕрарăмсене, хĕрсене Мартăн 8-мĕшĕ ячĕпе ăшшăн саламларĕ, ырлăх-сывлăх сунчĕ, Хĕле ăсатнипе çыхăннă мероприятие пурне те активлă хутшăнма сĕнчĕ.

Пурин кăмăлне çĕклесе ялти "Пилеш" фольклор ушкăнĕ (илемлĕх ертÿçи З.Карзанова, купăсçи Н.Захарова) Çăварни юррисем шăрантарчĕ. Кун хыççăн вара ял çыннисем тĕрлĕ вăйă-конкурсра вăй виçрĕç. Çĕнтерÿçĕсем призсем илчĕç.

Уявра ял-йыш тутлă шашлăкпа, техĕмлĕ чейпе, вĕри икерчĕпе сăйланчĕ. Мероприятие илем кÿрсе, хĕл иртсе пынине систерсе ял урамĕсем тăрăх çунасем кÿлнĕ, хăмпă-хăюпа, шăнкăравпа хитрелетнĕ урхамахсем вирхĕнчĕç. Лавсем çинчи хĕрарăмсем, купăс кĕвви янăранă май, Çăварни юррисене юрларĕç.

Уяв ирттерме спонсор пулăшăвĕ панăшăн Олеся, Петр, Мирослав Малеевсене, Петрпа Владислав Карзановсене, Андрейпе Григорий Ильинсене ял-йыш чĕререн тав турĕ.