19 июля 2014 г.
Шăрăх çанталăкра çынсене, уйрăмах ача-пăчана пĕве-кỹлĕ таврашне туртать. Кун пек чухне уçă шывра чăмпăлтатнине мĕн çиттĕр? Анчах нумай чухне пирĕнтен чылайăшĕ шывăн турачĕ çуккине манать. Асăрханусăрлăхпа тимсĕрлĕх вара инкек патне илсе пырасси те инçех мар. Кăçал кăна республикăра 16 çын путса вилнĕ, вĕсенчен улттăшĕ - ачасем. Телее, сакăр çынна вăхăт ра çăлса хăварма май килнĕ. Каникул вăхăтĕнче ялсене хулари ачасем те нумай килеççĕ. Вĕсенчен кашниех ишме пĕлет тесе çирĕплетме çук. Çавăнпа та аслисен ачасене пăхса-асăрхасах тăмалла, пĕлмен пĕвере е кỹлĕре шыва кĕме юраманни пирки каласа ăнлантармалла. Шыва кĕрекен ачасен çывăхĕнче çитĕннĕ, лайăх ишме, чăмма пĕлекен çынсем пулни тата лайăхрах, шанчăклăрах - инкеке вăхăтра сирсе яма май килĕ.
А.ЕЛИСЕЕВ, район администрацийĕн ятарлă программăсен секторĕн заведующийĕ.
Источник: "Шăмăршă хыпарĕ"