Публикации » Ан хурлан, тăван, ватлăх пăхнăшăн куçран...

ХАЛЬХИ вăхăтра районта Аслă Отечественнăй вăрçă инваличĕсемпе участникĕсем – 28 çын, тыл ĕçченĕсем – 659 çын, Раççей Федерацийĕн ĕç ветеранĕсем – 1798 çын, Чăваш Республикин ĕç ветеранĕсем – 25 çын, салтак арăмĕсем – 160 çын, репрессие çакланнисем – 28 çын, инвалидсем – 1396 çын, пенсионерсем – 5 пине яхăн çын пурăнаççĕ. Пенси илнисĕр пуçне ветерансем тĕрлĕ социаллă çăмăллăхсемпе усă кураççĕ.

Патшалăх ветерансене яланах тимлĕхре тытать. 9 уйăхра кăçал вĕсене тÿлеме 22 миллион та 915 тенкĕ тăкакланă. Ĕç ветеранĕсемпе тыл ĕçченĕсене укçан компенсаци те тÿленет. Инвалидсем те коммуналлă çăмăллăхсемпе усă кураççĕ, ку тÿлев уйăхра 736 тенкĕпе танлашать.

Районти Аслă Отечественнăй вăрçă участникĕсемпе салтак арăмĕсене – пурĕ 5 çынна – пурăнмалли условисене лайăхлатма сертификатсем панă, вĕсемпе усă курса çынсем хваттерсем туяннă.

Районти халăха социаллă пулăшу паракан центр инвалидсемпе ветерансене, пенсионерсене тĕллевлĕ пулăшу парса тăрать. Килсене çÿресе социаллă пулăшу параççĕ, вĕсене пысăк тимлĕх уйăраççĕ.

Пенсионерсемпе ветерансем вăхăтлăх пурăнмалли уйрăмсем районта виççĕ шутланаççĕ. Вĕсенче пурĕ 29 çын пурăнать.

Районта тĕрлĕ органсем кулленхи тимлĕх пирки те манмаççĕ. Тĕп больницăра вăрçă инваличĕсемпе участникĕсем уйрăм палатăра сипленеççĕ. Больницăра врач патне кĕнĕ, аптекăра эмел туяннă, тĕрлĕ ыйтупа райадминистрацине килнĕ чухне ветерансене черетсĕр йышăнаççĕ.

Хисеплĕ ватăсем, сире пурне те Пĕтĕм тĕнчери Ватăсен кунĕ ячĕпе чун-чĕререн ăшшăн саламлатпăр, çирĕп сывлăх, канлĕ ватлăх тата вăрăм кун-çул сунатпăр.