09 марта 2011 г.
"Пĕтĕм искусство тĕсĕнчен çын çине тỹрремĕн витĕм кỹрекенни театр шутланать. Вăл _ пирĕншĕн пуриншĕн те, чăн малтанах, пирĕн ачасемшĕн, ăс-хакăл сиплевçи тата вĕрентекен". (Чăваш Республикин Президенчĕ М.В. Игнатьев Патшалăх Канашне янă Çыруран). Çак кунсенче Шăмăршăри культура аталанăвĕн центрĕнче "Яланах театр" конкурс иртрĕ. Республика шайĕнчи фестивале Патăрьел, Комсомольски, Елчĕк тата Шăмăршă районĕсенчи халăх пултарулăхĕн театр коллективĕсем тата илемлĕ вулакансем хутшăнчĕç. Шупашкартан килнĕ жюри членĕсем _ ЧР тава тивĕçлĕ артисчĕ Иван Иванов (председатель), ЧР тава тивĕçлĕ артисчĕ Геннадий Кирилловпа Чăваш халăх артистки Анна Кутузова тата республикăри халăх пултарулăх çурчĕн методисчĕ, Çамрăксен театрĕн режиссерĕ, актерĕ Владимир Григорьев кашни коллективпа уйрăм вулаканăн творчество ăсталăхне тĕплĕн тишкерчĕç, тивĕçлĕ хак пачĕç. Фестиваль программине Шăмăршă районĕнчи театр коллективĕсемпе илемлĕ вулакансем уçрĕç. Чи малтанах В.Павловпа А.Петрова "Пулаймарăмăр пĕрле" литературăпа музыка композицийĕ кăтартрĕç. Вĕсем С.Асамат сăввисене професилле артистсем евĕр витĕмлĕн те ĕнентерỹллĕн вуларĕç, лирикăлла юрăсене те илемлĕн шăрантарчĕç. Малалла вара Шăмăршă вăтам шкулĕнчи "Çăлтăр" театр студийĕн (ертỹçи В.Львова) пĕчĕк актерĕсем А.Львовапа С.Еремеев проза сыпăкне тата сатирăлла сăвă йĕркисене çĕкленỹллĕ туйăмпа, сăнарлă ỹкерчĕксем туса вуласа пачĕç. Н.Угаринăн "Улька кинĕн виçĕ кинĕ" пьеси тăрăх Шăмăршăри халăх театрĕ (режиссерĕ В.Львова) кăтартнă сыпăка та куракансем ăшшăн йышăнчĕç. В.Хорькова (Улька), А.Петрова (Марук), В.Павлов (Миша), А.Исаева (Вера), Н.Милюшкина (Люба), О.Тимофеева (Надя) хăйсен ролĕсене пысăк ăсталăхпа калăпларĕç. "Вĕрентеççĕ арăмсем" спектаклĕн сыпăкĕнче те _ рольсенче Ф.Малов, В.Павлов, А.Нефедова, В.Львова тата Т.Чернова вылярĕç _ хăй тĕллĕн вĕреннĕ артистсем халăх театрĕн "вучахĕ" илемлĕн ялкăшнине çирĕплетрĕç. "Кушак" сценкăра А.Нефедова, А.Верьялов, В.Львовапа Т.Сергунова, "Çăмарта ăшалаççĕ" сценкăра Т.Сергунова, В.Львовапа А.Нефедова ăста вылярĕç. Кивĕ Чукалтан килнĕ драма кружокĕн (ертỹçи З.Карзанова) членĕсем те хăйсен пултарулăхĕпе чун-чĕрере ăшă туйăм хăварчĕç. Н.Захарова, Л.Денисова, Н.Измайловапа Т.Малеева "Садикри ачасен калаçăвĕ" кулăшла сценкăна (пĕчĕккисен костюмĕсене хăйсемех çĕленĕ) пысăк ăсталăхпа выляса пачĕç. Палтиелĕнчи Т.Долгова "Пĕр актер театрĕ" жанрĕнче палăрчĕ, "Анне" литературăпа музыка композицийĕ кăтартрĕ. Фестиваль программине малалла тăсса, Патăрьел районĕнчи Упамса ялĕнчи клуб çумĕнчи драма кружокĕн членĕсем Е.Сымова çырнă пьеса тăрăх хатĕрленĕ спектакль сыпăкне кăтартрĕç. Çак районти Аслă Арапуçĕнчен килнĕ Е.Шурякова _ вăл пуçламăш класра кăна вĕренет-ха _ К.Иванов çырнă "Нарспи" поэма сыпăкне чăн-чăн артистка евĕр тата витĕмлĕн сăнарласа вуларĕ. Комсомольски районĕнчен килнĕ артистсем "Кукша пуçа куршанкă çыпăçмасть" спектакльпе савăнтарчĕç (Пьеса авторĕ _ Т.Минуллин, режиссерĕ _ З.Хайрутдинова). Елчĕк районĕнчи О.Степановапа Т.Михайлова пысăк туйăмпа сăвă вуларĕç. Л.Чернова "Пурнăç илемне туйса" литературăпа музыка композицийĕпе савăнтарчĕ. Фестиваль кăтартăвĕсене пĕтĕмлетсе, жюри председателĕ И.Иванов Шăмăршăри халăх театрĕн режиссерĕн В.Львован, вăл ертсе пыракан коллективăн сцена ăсталăхĕ çỹллĕ шайра тăнине, В.Павловпа А.Петрова "Поэзи театрĕнче" пысăк пултарулăх кăтартнине, В.Хорькова Улька рольне витĕмлĕн сăнланине палăртрĕ. Иван Иванович çавăн пекех Елчĕк районĕнчи Л.Чернован тата Патăрьел районĕчи Е.Шурякован художество номерĕсене те пысăк хак пачĕ.