Публикации » Килех, ырă çуркунне!

ПУЯНКАССИНЧИ "Пучах" ача садĕнче "Çуркунне" ятпа уяв кунĕ иртрĕ. Çак куна ачасем чăтăмсăррăн кĕтрĕç, сăвă-юрă вĕренчĕç. Чи интересли вара - ашшĕсемпе пĕрле ăсталанă шăнкăрч вĕллисен куравĕ пулчĕ. Вĕсене тăрăшса, пĕринчен теприне чаплăрах тунă. Паллах, вĕсене кайран урама тухса çакрĕç, вĕсем çине шăнкăрчсем ларса çунат çапса хăйсен юррисене шăрантараççĕ, иртсе çÿрекен çынсен кăмăлне çĕклеççĕ.

Садике çÿрекен ачасене пĕчĕкренех çут çанталăка юратма, унăн пуянлăхне упрама вĕрентетпĕр. "Кайăксен тусĕсем" ятпа ирттернĕ утренникра та сăмах çут çанталăк, кайăк-кĕшĕк çинчен пычĕ. Ирина Никифорова воспитатель ĕлĕкрех çуркуннене мĕнлерех кĕтсе илни пирки каласа кăтартрĕ, пирĕн тăрăхра пурăнакан кайăксемпе паллаштарчĕ. Ачасем те вĕçен кайăксем çинчен мĕн пĕлнине савăнсах пĕлтерчĕç, кайăксене халалласа çырнă юрăсем юрларĕç.

Аслă ушкăна çÿрекен шăпăрлансем кĕçĕн ушкăнрисем валли "Мухтанчăк мулкач" юмах тăрăх сценка лартрĕç. Сăнарсене питĕ тимлĕн сăнаса пăхса ларчĕç вĕсем. Юмахри Хура курак сăмахĕсене асра хăварма шут тытрĕç.

Çуркуннене сăнлакан ÿкерчĕксен куравĕ те пурне те килĕшрĕ. Уйрăмах Ксения Батрова ĕçне пысăк хак пачĕç.

Ырă та савăк кăмăлпа çуркуннене кĕтсе илтĕмĕр. Кĕçех шăнкăр-шăнкăр шыв юхса иртĕ те тавралăх симĕс тум тăхăнĕ. Тÿпере сарă хĕвел йăл кулса ачасене урамалла йыхравлĕ.