Публикации » Бразили каччин команди Пуянкассинче Кубока тивĕçрĕ

Тÿрех калатăп, Пуянкасси ял-йышĕ, паллах, ытларах арçынсем, калама çук савăннă: иккĕмĕш çул Тăван çĕр-шыв хÿтĕлевçин кунĕнче ялта пысăк уяв иртет. Кăçал та унта çак ялта çуралса ÿснĕ Сергей Андронов пуçарăвĕпе йĕркеленсе кайнă мини-футбол енĕпе ăмăртура тĕрлĕ çĕртен пухăннă командăсем Кубокшăн тытăçрĕç.

Турнирăн пĕлтĕрхи çĕнтерÿçин – "Хамăрял" командăн çамрăкĕсем 2012 çулта та Кубока алран ямарĕç. Командăн капитанĕ Альберто да Силва палăртнă тăрăх, кăçал çĕнтерме темиçе хут йывăртарах пулнă, пур матчра та пĕтĕм ăсталăхне кăтартма тивнĕ. Чăнах та, çĕнтерÿçĕсем иккĕмĕш вырăн йышăннă Шăмăршăсене пенальтипе тапса кăна парăнтарчĕç. Сăмах май, Бразили каччи Пуянкассинче виççĕмĕш хут ĕнтĕ. Афганистанра вилнĕ Валерий Кузнецова асăнса кашни çул ирттерекен турнирта та вăл пĕлтĕр "Хамăрял" командăшăн выляса халăха савăнтарнăччĕ.

Ытти матчсем те кăçал хĕрÿ иртрĕç. "Хамăрял" команда ветеранĕсем Шăмăршăсене пенальтипе çеç выляса ячĕç, çĕнтерÿçĕсене те вăйă тăршшĕпе лăпкă пурнăç кăтартмарĕç. Çак командăра ытларах Пуянкассинче çуралса ÿснĕ, халĕ Шупашкарта пурăнакан футболистсем выляççĕ. Енчен те командăн чи чаплă хÿтĕлевçи Камерун ачи Ромео Нгеле (унăн ăсталăхне те Пуянкассисем пĕлтĕр курса тĕлĕнчĕç) хальхинче те килнĕ пулсан, тен, "Хамăрял" командăн ветеранĕсем турнир таблицинче чылай çÿлĕрех пулатчĕç.

Пуянкасси ветеранĕсен "Ас тăвăм" команди те ял-йыша илемлĕ вăйăпа тĕлĕнтерчĕ. 1980 çулсен вĕçĕнче футбол енĕпе Чăваш Республикин Кубокне тивĕçнĕ вылякансем халĕ те ăнăçлă вăйă кăтартма пултарнине çирĕплетрĕç. Турнирăн кăткăс регламентне пула çеç виççĕмĕш вырăна тухнă Пуянкассипе Виçпÿрт ялĕсен çамрăкĕсен "Шурăмпуç" команди вара, шел пулин те, чаплă вăйăпа савăнтараймарĕ. Пĕлтĕр иккĕмĕш вырăн йышăннă команда ытти турнирсенче çитĕнÿсем тăвасса шанас килет.

Ăмăртура, чи лайăх командăсемсĕр пуçне, чи лайăх вылякансене те палăртрĕç. Чи лайăх хапхаçă - пур вăйăра та пĕр гол та кĕрттермен Антон Ягудин ("Хамăрял" çамрăкĕсем), чи лайăх хÿтĕлевçĕ - Станислав Егоров ("Хамăрял" ветеранĕсем), чи лайăх çурма хÿтĕлевçĕ - Александр Андреев ("Хамăрял" ветеранĕсем), чи лайăх тапăнакан ятне Дмитрий Смирнов ("Пучах", Шăмăршă) тивĕçрĕ.

Çĕнтерекенсем ăмăртăва йĕркелекенсенчен сумлă парнесене тивĕçрĕç. Пуянкасси çыннисем Сергей Андронов, Александр Тимофеев, Юрий тата Владимир Ефимовсем турнира ирттерме нумай вăй хучĕç. Паллах, Сергей Андроновăн ялти тусĕсем пулăшман пулсан ăмăртăва ирттерме нимĕнле те май çукччĕ. Вĕсене те пысăк тав.

Кăçалтан вара Пуянкассисен шухăшĕсем чăннипех те çирĕпленчĕç: кашни çул Тăван çĕр-шыв хÿтĕлевçин кунне футболла выляса паллă тумалла.