13 февраля 2008 г.
КАРАПАЙ ШĂМĂРШĂРИ ял поселенийĕн библиотекипе вырăнти вăтам шкул хушшинче ĕçлĕ çыхăнусем йĕркеленнĕ. Учительсем хăш-пĕр уроксене ялти библиотекăра йĕркелеççĕ. Акă, нумаях пулмасть вырăс чĕлхипе литература учителĕ И.И.Солдатова унта улттăмĕшсемпе "Писатели 19 века" темăпа урок ирттерчĕ. Модельлĕ библиотека статусне илнĕ май, ял библиотекинче паянхи куна туллин тивĕçтерекен компьютер техники пур, тĕрлĕ тематикăллă электронлă изданисем те çителĕклĕ. Опытлă учительница И.И.Солдатова _ Ирина Ивановна шкулти ачасене 23 çул ĕнтĕ çирĕп никĕслĕ пĕлỹ парать _ темăна тĕплĕн те вĕренекенсемшĕн интереслĕ ăнлантарса пынă май, библиотека заведующийĕ А.А.Медведева компьютерпа усă курса вырăс писателĕсен _ Н.Гоголĕн, М.Салтыковăн, М.Лермонтовăн, А.Пушкинăн тата ыттисен фотоиллюстрацийĕсене кăтартрĕ, Интернет çыхăнăвĕ урлă ытти паха материалпа паллаштарчĕ. Çỹллĕ методика шайĕнче йĕркеленĕ урок ачасене питĕ килĕшрĕ.
Источник: "Шăмăршă хыпарĕ"