16 января 2014 г.
Карапай Шăмăршăри Г.Андреева (хĕр чухнехи хушамачĕ) шкулта яланах «5» паллăсемпе вĕренсе пынă. Уйрăмах математикăпа физика, химипе биологи предмечĕсене килĕштернĕ Галина. Обществăлла ĕçсене, спорт ăмăртăвĕ-сене те хастар хутшăннă вăл. 1973 çулта, 7 класс пĕтерес умĕн, химипе биологи учителĕ В.Ларионова ăна уроксем хыççăн кабинетрах юлма ыйтнă.
– Галя, санра эпĕ пулас педагога куратăп, – тенĕ Василиса Прохоровна. – Эсĕ физикăпа математика е химипе биологи учителĕ пулма пултаратăн. Шупашкарти физикăпа математика шкулĕнче пур предметпа та тарăнлатнă программăпа вĕрентеççĕ. Тĕпрен илсен, унта ачасене аслă вĕренÿ заведенийĕсене вĕренме кĕме хатĕрлеççĕ. Çав шкулта аттестат илсен пединститута хăш факультета вĕренме кĕрессине хăв суйласа илме пултаратăн.
Опытлă педагогăн сĕнĕвĕ, паллах, вĕренÿ отличницине, хастар общественницăна питĕ илĕртнĕ. Ара, учитель профессийĕ яланах чи сумлисенчен пĕри пулнă-çке-ха. Ашшĕпе амăшĕ – Григорий Андреевичпа Александра Федоровна – хăйсен хĕрачин çутă ĕмĕтне ырласа йышăннă.
Çав çулах, Шупашкарти физмат шкулĕнчи вĕренме кĕмелли экзаменсене «5» паллăпа тытса, Галя çак учрежденире пĕлÿ пухма пуçланă. Пĕлÿ тĕнчин вăрттăнлăхĕсене çулран-çул ăнăçлă алла илсе пынă мал ĕмĕтлĕ хĕр, пĕрлех волейболпа баскетбол секцийĕсене те çÿренĕ.
1976 çулта Г.Андреева Чăваш патшалăх педагогика институчĕн биологипе хими факультетне вĕренме кĕнĕ. Вăл В.Ларионова пекех лайăх учительница пулма ĕмĕтленнĕ.
1981 çулта биологипе хими учителĕн дипломне илсен çамрăк специалиста тăван ялах – Карапай Шăмăршă шкулне ĕçлеме янă. Химипе биологи предмечĕсемпе ачасене тарăн пĕлÿ парасси Галина Григорьевнăшăн пурнăç пĕлтерĕшĕ пулса тăрать. Хăйне шанса панă уроксене яланах тивĕçлĕ методика шайĕнче тата ачасемшĕн интереслĕ ирттерме тăрăшать. Педагогикăри çĕнĕлĕхсене, ĕçтешĕсен ĕç опытне те куçран вĕçертмест. Тăван ялăн ĕçчен те сăпайлă каччипе – П.Измайловпа пĕр çемьене пĕрлешни ĕçре çĕнĕ хавхалану кÿнĕ.
Çулсем, çулсем... Ытла та хăвăрт иртеççĕ-çке вĕсем! Галина Григорьевна педагог ĕçне пуçăннăранпа 33 çул çитет ĕнтĕ. Çак тапхăрта Г.Измайлова яланах ăнăçлă ĕçлесе пынă. Пархатарлă ĕçпе ĕçтешĕсен, вĕренекенсен, ял çыннисен хисепне тивĕçнĕ.
Опытлă педагог хăйĕнчен те, вĕренекенсенчен те çирĕп ыйтать. Кашни ачапа уйрăммăн ĕçлессине те манăçа хăвармасть. Химипе биологи курсĕсене вĕрентмелли хальхи меслетсене алла илнĕ педагог уçă уроксенче хăйĕн ĕç опычĕпе районти ĕçтешсене те паллаштарать.
Галина Григорьевнăн вĕренекенĕсем республикăри, районти предмет олимпиадисене те активлă хутшăнаççĕ, вĕсенче призлă вырăнсем çĕнсе илеççĕ. Акă, 2012-2013 вĕренÿ çулĕнче районти олимпиадăра пĕр вĕренекен химипе – пĕрремĕш, икĕ вĕренекен биологипе иккĕмĕш вырăнсене тухнă. 2013-2014 вĕренÿ çулĕнче пĕр ача экологипе пĕрремĕш, икĕ вĕренекен химипе иккĕмĕшпе виççĕмĕш, икĕ ача биологипе иккĕмĕш вырăнсене тивĕçнĕ. Г.Измайлова учительница ертсе пынипе, вĕренекенсем районти «Наука. Творчество. Аталану» наукăпа практика конференцийĕн «Хими» секцийĕнче проектсем хÿтĕлессипе умлă-хыçлă 3 çул ĕнтĕ пĕрремĕш вырăн çĕнсе илеççĕ. Галина Григорьевнăн вĕренекенĕсем выпускной экзаменсене те ăнăçлă тытаççĕ.
Яланах тÿрĕ кăмăлпа, професси ăсталăхĕпе ĕçленĕшĕн Г.Измайлована Раççей Федерацийĕн тата Чăваш Республикин Вĕрентÿ министерствисен Хисеп грамотисемпе наградăланă. Çак кунсенче, 55 çул тултарнă май, хăйне район администрацийĕн Хисеп грамотипе чыслани те пĕрремĕш категориллĕ учительницăна питĕ савăнтарчĕ. Юратнă мăшăрĕ, хĕрĕ, тăванĕсем, ĕçтешĕсем, тантăшĕсем, кÿршисем чаплă юбилей ячĕпе саламласа ăшă сăмахсем калани Галина Григорьевнăн чун-чĕрине çĕнĕ вăй-хăват кÿчĕ.
И.АНАНЬЕВ.
Источник: "Шăмăршă хыпарĕ"