28 августа 2013 г.
Августăн 23-мĕшĕнче психоневрологи интерначĕсенче пурăнакан-сипленекен инвалидсен республикăри спорт фестивалĕ иртнĕ. Спорт уявĕнче пурĕ 7 команда вăй виçнĕ.
Инвалидсен спорт фестивальне кĕске сăмах каласа Чăваш Республикин Сывлăх сыхлавĕн тата социаллă аталану министрĕн çумĕ Александр Медюков уçнă.
Командăсем çăмăл атлетика эстафетинче чупнă, пĕчĕк çĕмрене мишене лектерессипе ăмăртнă, вĕрен туртассипе вăй виçнĕ. Спортăн 3 тĕсĕн кăтартăвĕсене пĕтĕмлетнĕ хыççăн Калининăри психоневрологи интерначĕн команди пĕрремĕш вырăн çĕнсе илни палăрнă. Ăна куçса çÿрекен кубок парса чысланă. Кукеçри ача-пăча çурчĕн-интерначĕн ачисен команди иккĕмĕш вырăна тивĕçнĕ. Карапай Шăмăршăри психоневрологи интерначĕн команди виççĕмĕш вырăна тухнă.
В.ШУМИЛОВ.
Источник: "Шăмăршă хыпарĕ"