17 апреля 2013 г.
КАРАПАЙ Шăмăршăри пĕтĕмĕшле пĕлÿ паракан вăтам шкулта вырăс чĕлхипе литературине вĕрентекен Валентина Ивановна Сельцован – юбилей! Çак пархатарлă профессине суйласа илме ăна кĕнеке вулама юратни пулăшнă. Кĕçĕн классенче вĕреннĕ çулсенчех Валентина Филиппова (хĕр чухнехи хушамачĕ) библиотекăн хастар вулаканĕ пулнă. Уроксем хыççăн пушă вăхăтне пĕрмаях библиотекăра ирттернĕ. Вăл вуламан пĕр кĕнеке те юлман пулĕ. Уйрăмах вырăс классикĕсен хайлавĕсене ки- лĕштернĕ.
Çавăнпах пуль Канаш районĕнчи Çеçпĕл ялĕнчи вăтам шкултан вĕренсе тухсан тÿрех Чăваш патшалăх педагогика институчĕн филологи факультетне çул тытнă. Ăна 1985 çулта ăнăçлă вĕçленĕ хыççăн, Валентина Ивановна 28 çул ĕнтĕ ачасене литературăн анлă та интереслĕ тĕнчи тăрăх илсе çÿрет. Вырăс чĕлхин вăрттăнлăхĕ-сене алла илме пулăшать.
Районта В.И. Сельцован уçă урокĕсенче пулса курман учитель çук та пулĕ. Урăх шкулсенчи вырăс чĕлхипе литература вĕрентекенĕсене час-часах хăйĕн ĕç опычĕпе паллаштарать. Шкул ертÿçисен канашлăвĕсен кунĕсенче те дирекци хăнасене яланах пуян опытлă Валентина Ивановнăн урокĕсене курма сĕнет. Тата районти методика кабинечĕ ыйтнипе çамрăк специалистсем валли ятарласа миçе хутчен урок ирттермен-ши; Тĕрĕссипе, хăнасем валли тесе уйрăм хатĕрленмен те пуль вăл. Унăн кашни урокĕ, хăть хăçан та, çÿллĕ шайра иртет. Çамрăксене унран вĕренмелли чăннипех те нумай. Вăл кашни уроках тĕплĕн хатĕрленет, урокăн кашни минучĕпе туллин усă курать.
Мĕнпе палăрса тăрать-ха Валентина Ивановнăн ачасене вĕрентес ăсталăхĕ; Ман шутпа, çĕнĕ технологисемпе анлă усă курса ĕçленипе. Шкул ачисене тĕпчев ĕçне явăçтарма пĕлнипе. Вăл вĕрентекен ачасем районти тĕпчев конкурсĕсенче тăтăшах дипломсемпе грамотăсене тивĕçнĕ.
Ăста вĕрентекенĕн тепĕр паха енĕ – урока илемлетме пĕлни. Унăн урокĕсенче час-часах – темăпа çыхăннă искусство элеменчĕсем: е юрă, е художниксен картинисем, е компьютер пулăшнипе ха- тĕрленĕ презентаци, курав тата ытти те. Çапла майпа вĕренекенсем темле кăткăс темăна та çăмăллăнах парăнтараççĕ, ывăнмасăр тухăçлă ĕçлеççĕ.
Литература урокĕнче вара яланах – сăвă çаврăмĕсем. Сăвăсене яланах пăхмасăр вулать – ытарлă, чĕрене витермелле, пĕтĕм чунтан!
Районта вырăс литературипе иртекен олимпиадăсенче В. Сельцова вĕрентекен ачасем тăтăшах лайăх вырăнсем йышăнаççĕ. Район чысне республикăра хÿтĕлекенсем те пулнă (Е.Александрова, М.Ельцова). Çулсерен Раççей шайĕнче тĕрлĕ-тĕрлĕ конкурссенче: «Кругозор», «Русский медвежонок», «Юниор» тата филологи чемпионатĕнче хутшăнакансем те пайтах. Çак çитĕнÿсем – учитель ачасене хавхалантарса ĕçлеме пĕлнинче. Ахальтен мар 2011 çулта В.И. Сельцован паха ĕç опытне районта лайăххисенчен пĕри тесе йышăннăччĕ, унпа ытти шкулсенче усă курма сĕннĕччĕ.
Хальхи вăхăтра Валентина Ивановна – 9-мĕш класс ертÿçи. Ку ĕçе те вăл пысăк яваплăхпа пурнăçласа пырать. Кашни ача валлиех ăшă кăмăл, тимлĕх çитет унăн. Яланах ашшĕ-амăшĕпе – тачă çыхăнура. Çавăнпах ăна вĕсем хисеплеççĕ, тĕрлĕ ыйтупа класс ертÿçипе уççăн, шанса калаçаççĕ.
Шкул директорĕн вĕрентÿпе воспитани енĕпе ĕçлекен çумĕ Р.С.Андреева акă епле сăнласа пачĕ хăйĕн ĕçтешне:
– Валентина Ивановна питĕ ĕçчен, вĕрентÿре çĕнĕлĕхсем шыракан учитель. Кашни ĕçех тĕплĕн, вăхăтра пурнăçлать. Питĕ нумай вулать, професси шайне çулсерен ÿстерсех пырать.
Хисеплĕ Валентина Ивановна, юбилей ячĕпе Сире! Ĕçре те, çемьере те çитĕнÿ çумне çитĕнÿ хутшăнсах пытăр!
Г.ИВАНОВА.
Источник: "Шăмăршă хыпарĕ"