Публикации » Çул çинче тимлĕ пулар

ÇУЛ ÇИНЧИ аварисен шутне чакарас тĕлĕшпе Чăваш Енре октябрĕн 20-мĕшĕнчен пуçласа декабрĕн пĕрремĕшĕччен çуран çÿрекенсене хăрушлăх пирки асăрхаттарса социаллă кампани пырать. Шăпах палăртман вырăнсенче çул урлă каçнă чухне çынсем хăйсене хăрушлăха кĕртсе ÿкереççĕ, аварисем пулнин пысăк сăлтавĕ те çуран çÿрекенсен тимсĕрлĕхĕпе çыхăннă.

Районти çул-йĕр хăрушсăрлăхĕн инспекцийĕн ĕçченĕсем Карапай Шăмăршăри пĕтĕмĕшле пĕлÿ паракан вăтам шкулта вĕренекенсемпе пĕрле "Çĕрпÿ-Ульяновск" автоçул çине тухса машинăсене чарса водительсене чĕнÿ çырăвĕсем тыттарнă. Унта çапларах çырнă: "Эпир, ачасем, час-часах хамăр тимлĕхе çухататпăр. Эсир те, хаклă водительсем, руль умĕнче ларса пынă чухне юлташăрпа е телефонпа калаçнă май çул çинчи пулăмсене асăрхамастăр. Ку вара пысăк инкек патне илсе çитерет. Çав вăхăтра çул çинче пысăк хăрушлăх сиксе тухма пултарать, çынна таптама е çапса хăварма пулать. Вăл вара манăн анне е атте, асанне е асатте пулĕ. Вĕсене эсĕ ман валли упра, мана тăлăха ан хăвар! Енчен те эсĕ те, эпир те çул çинче тимлĕ пулсан, аварисен шучĕ те чакĕ. Телейлĕ çул пултăр сана, водитель!"

Паллах çул çинче пирĕн кашнийĕнех тимлĕ пулмалла. Çакăн пирки ачасене ашшĕ-амăшĕн те, вĕрентекенсен те, çитĕннисен те аса илтерсех тăмалла.