Публикации » Тавах, Анна Васильевна!

ХĂШ-ПĔР çынсем шăпах вăл е ку професси валли çуралнă тейĕн. Вĕсем юратнă ĕçре çулран-çул чăтăмлăн тата професси ăсталăхĕпе ĕçлесе пыраççĕ, çынсемпе яланах ăшшăн калаçаççĕ, май килнĕ таран пулăшма тăрăшаççĕ. Çакнашкал специалистсем ял-йыш хисепне тивĕçеççĕ. Шăпах вĕсен шутне кĕрет те ĕнтĕ Карапай Шăмăршăри фельдшерпа акушер пункчĕн заведующийĕ А.В.Гаврилова.

Профессие суйласа илнĕ чухне чылайăшĕ вăл е ку специальноçпа вăй хуракан сумлă çын ĕçне тĕпчевлĕн сăнаса хаклать, ун пекех лайăх специалист пулас ĕмĕтпе пурăнать.

Çĕнĕ Тăрăнти Анна Ивановашăн (хĕр чухнехи хушамачĕ) Карапай Шăмăршăри медпункт фельдшерĕ Т.А.Яковлева ырă тĕслĕх вырăнĕнче пулнă. Татьяна Антоновна шкула медицина профилактикин ĕçĕсене тума килсен вĕренÿ отличници ун çине яланах ăмсанса пăхнă. 1972 çулта ялти шкулта 8 класс пĕтерсен Анна умĕнче ăçта вĕренме каясси пирки ыйту тăман. «Татьяна Антоновна пекех фельдшер пулатăп, çынсене сиплетĕп», – шутланă хĕр.

Анна Иванова Шупашкарти медицина училищин фельдшерсен уйрăмне вĕренме кĕнĕ. «5» паллăсемлĕ свидетельствăллă хĕре экзаменсем памасăрах йышăннă.

Хĕрÿ вĕренÿре çулсем пĕрин хыççăн тепри хыçа юлнă. 1976 çулта фельдшер дипломĕллĕ хĕрĕн сиплев ĕçĕнчи биографийĕ Асанкассинчи медпунктра пуçланнă. Хăйĕн ĕçне юратса пурнăçлакан, учрежденире çынсене яланах ăшшăн йышăнакан çамрăк специалиста ял-йыш тÿрех килĕштернĕ. Çав çулах сăпайлă хĕр тăван ял – Çĕнĕ Тăрăн каччипе Георгий Гавриловпа çемье çавăрнă.

1977 çулта, Т.А.Яковлева пенсие тухсан, А.В.Гаврилова Карапай Шăмăршăри медпункта ĕçлеме куçнă. Е.Р.Лукьянова медсестрапа, О.П.Поликарпова санитаркăпа пĕр-пĕрне ăнланса ĕçленĕ. 1981 çулта пĕчĕк коллектива Н.И.Волкова акушерка та хутшăннă. Медицина ĕçченĕсем ял-йыша ăнăçлă сиплессишĕн, чир-чĕртен сыхлакан профилактика мероприятийĕсене вăхăтра пурнăçлассишĕн пĕтĕм вăя парса ĕçленĕ.

Е.Р.Лукьянова тивĕçлĕ канăва кайнăранпа, 1994 çултанпа, сиплев ĕçĕнче А.В.Гавриловапа Н.И.Волкова иккĕнех тăрăшаççĕ. Вĕсем хальхи вăхăтра Карапай Шăмăршăри, Çĕнĕ Тăрăнти, çынсен, вырăнти шкулта вĕренекенсен, ача сачĕн воспитанникĕсен сывлăхне пăхса-тĕрĕслесе тăраççĕ. Ял çыннисемпе яланах кăмăллăн калаçаççĕ, чирлисен ыратăвне май килнĕ таран çăмăллатма тăрăшаççĕ. Ача е çитĕннĕ çын çĕрле сасартăк чирлесе ÿксен, вĕсем тÿрех каланă вырăна васкаççĕ, тивĕçлĕ пулăшу пама тăрăшаççĕ. Шăпах çакăншăн тата ырă кăмăллă пулнăшăн хисеплет те ĕнтĕ ял-йыш Анна Васильевнăпа Надежда Ивановнăна. Вĕсем темиçе хутчен те «Районти чи лайăх медицина ĕçченĕ» хисеплĕ ята тивĕçнĕ.

Профилактика ĕçне те манăçа хăвармаççĕ вĕсем. Кăçал кĕркунне, «Сывлăх» наци программипе килĕшÿллĕн, 250 çынна тÿлевсĕрех гриппран прививка тунă. Çак йышран çуррине яхăн – ачасем. Наци календарьне тĕпе хурса, шкулта вĕренекенсене, ача сачĕн воспитанникĕсене ытти чир-чĕртен те прививка процедурине туса ирттернĕ. Фельдшерпа медсестрана ĕçре Наталия Ширшлина санитарка пулăшать.

Пурнăç анинче хамăр сисмесĕрех каçалăк хыççăн каçалăк хыçа хăваратпăр. Нумаях пулмасть А.В.Гаврилова хăйĕн 55 çулхи юбилейне уявларĕ. Пултаруллă фельдшера, ырă кăмăллă хĕрарăма, фольклор ушкăнĕн хастар солисткине чаплă юбилей ячĕпе савнă мăшăрĕ, икĕ хĕрĕпе пĕр ывăлĕ, 3 мăнукĕ, тăванĕсем, ĕçтешĕсем, кÿрши-арши ăшшăн саламларĕç, çирĕп сывлăхпа тулли телей, вăрăм ĕмĕр сунчĕç. Район администрацийĕ хăйне иккĕмĕш хут Хисеп грамотипе наградăлани те Анна Васильевнăна чунтанах савăнтарчĕ, хавхалантарчĕ.