Публикации » Карапай Шăмăршăра та часовня пулĕ

КАШНИЙĔНЧЕХ, хам çуралнă тăван ялăма - Карапай Шăмăршăна кайсан, мĕн те пулин çĕннине, ыррина курса тĕлĕнетĕп, савăнатăп. Çак кунсенче автобуспа яла çитсен, Школьная урамне кĕрсен Юрий Столяров предприниматель лавккипе юнашар çеремлĕ вырăнта халăх ĕçленине асăрхарăм. Çынсем хушшинче ял поселенийĕн пуçлăхне В.Денисова та куртăм, мĕнлерех çурт тунипе кăсăклантăм.

- Ял халăхĕпе пĕрле часавня тума пуçларăмăр-ха, - хавхаланса калаçрĕ Владимир Васильевич. - Акă унăн никĕсне яратпăр. Пурте хастар ĕçлеççĕ. Ара, хамăрăн Туррăмăрăн сăваплă çуртне тăватпăр-çке.

Аппа патне çитсен çакна пĕлтĕм. Ялта часавня тума укçа-тенкĕ пуçтараççĕ-мĕн. Кам мĕн чухлĕ пултарать - çавăн чухлĕ парать. Ял-йыш ĕçпе те пулăшать. Часавня тăвассине кашниех Турă умĕнчи пархатарлă ĕç вырăнне хурса йышăнать.

Эпĕ каç еннелле каялла Шăмăрша килме тухсан автокран пулас часавня никĕсĕн юлашки блокне хунăччĕ ĕнтĕ. Ку, паллах, мана чунтанах савăнтарчĕ. Ялтах Турă çурчĕ пулни – питĕ вырăнлă. Ял çыннисем часавньăна туса пĕтересси пирки иккĕленÿ çук. Вĕсем хуть мĕнле пархатарлă ĕçе те вĕçне çитереççех. Часавньăна туса пĕтерсен ял çыннисем кунта Турра кĕл туса, çуртасем çутса чун канăçлăхне, Турă сăваплăхне илĕç, пĕр-пĕрне ытларах юратма, ырă ĕçсем тума чун-чĕрене, ÿт-пĕве çĕнĕ вăй-хăват кÿрĕç.