21 февраля 2011 г.
2007 çулхи сентябрь уйăхĕнче Карапай Шăмăршăри вăтам шкулта кадетсен класне йĕркеленĕ. Çак хисепе пиллĕк-мĕшсем тивĕçнĕ. Опытлă педагогсем _ класс руководителĕ Г.Г.Измайлова тата кадетсен воспитатель-наставникĕ В.В.Столяров ачасенче Тăван çĕр-шыва юратас тата патриотика туйăмне вăйлатас енĕпе çине тăрса ĕçлеме пуçланă. Кадетсем уроксем вĕçленсен хушма занятисенче пулаççĕ. Стройпа утасси, физкультурăн ятарлă комплексне пурнăçласси, топографипе туризмăн тĕп никĕсне хăнăхасси, этикет тата психологи хутшăнăвĕсене алла илесси, илемлĕ калаçма тата ташлама вĕренесси кадетсен "Çăлтăр" класĕнче кашни вĕренỹ çулĕнчех яланхи йĕркепе пырать. Паллах, класс сехечĕсенчен чылайăшĕ патриотика темипе çыхăннă. Галина Григорьевнăпа Валерий Викторович кадет класĕпе çулран-çул чăтăмлăн ĕçлесе пыраççĕ. Педагогсем кадетсемпе тĕрлĕ мероприятисем нумай йĕркелеççĕ, вĕсене тĕрлĕ конкурссене кайма хатĕрлеççĕ. Халĕ кадетсем 8-мĕш класра вĕренеççĕ ĕнтĕ. Вĕсем вĕренỹре те, шкулăн обществăлла пурнăçĕнче те активлăхпа палăрса тăраççĕ. Кăçалхи вĕренỹ çулĕн иккĕмĕш чĕрĕкне 20 вĕренекенрен 9-шĕ "4" тата "5" паллăсемпе вĕçленĕ. Взвод командирĕ Алина Петькова тата Елена Столярова _ отличницăсем, Влада Прохорова (отделени командирĕ), Алина Купташкина, Алена Елисеева, Елена Иванова, Мария Максимова, Павел Столяров тата Максим Мамонтов _ ударниксем. Кадетсем районти тата республикăри çарпа патриотика фестивалĕсемпе конкурссене те активлă хутшăнаççĕ. Вĕсем çамрăк армеецсен çар вăййисенче шкул командине хутшăнса лайăх результатсем кăтартаççĕ. 2010 çулхи июнĕн 26 _ июлĕн 1-мĕшĕсенче республикăра иртнĕ "Орленок" çар вăййисенчен Карапай Шăмăршă шкулĕн отделенийĕ _ ăна Алина Петькова ертсе пынă _ тĕрлĕ енлĕ пултарулăх кăтартса 4 Грамотăпа таврăннă. Октябрь уйăхĕнче Комсомольскинче иртнĕ кадетсен зонăри смотр-конкурсĕнче "Çăлтăр" класс отделенийĕ виççĕмĕш вырăн йышăннă. Ноябрь уйăхĕнче Çĕнĕ Шупашкарта йĕркеленĕ кадетсен республикăри смотр-конкурсĕнче Карапайшăмăршăсем 20 ытла команда хушшинче хисеплĕ 5-мĕш вырăна тухнă, Диплома тивĕçнĕ. Стройпа кăтартуллăн утнăшăн та вĕсене Грамота парса чысланă. Кадетсемпе шкул выпускниксĕсем _ çар офицерĕсем те тăтăш тĕл пулса калаçаççĕ. Офицерсем хăйсен служби пирки каласа параççĕ, вăтам пĕлỹ илнĕ хыççăн çар институчĕсене вĕренме кĕмелли условисемпе паллаштараççĕ. Юлашки 2 çулта кăна вĕсем П.Алексеев полковникпа, Е.Вашуркин аслă лейтенантпа тата запасри подполковниксемпе _ А.Черновпа, В.Петровпа тĕл пулчĕç. "Офицер пулас тесен мĕн тумалла?" _ ыйтрĕç вĕсенчен арçын ачасем. "Шкулта яланах лайăх паллăсемпе вĕренмелле, ỹт-пĕве спортпа пиçĕхтермелле, кадетăн хисеплĕ ятне çỹлте тытмалла", _ терĕç шкулăн мухтавлă выпускникĕсем.
Источник: "Шăмăршă хыпарĕ"