26 декабря 2007 г.
ВАСАНТИ вăтам шкулта "Вырăс сăмахĕ" ятпа вырăс чĕлхипе литературин эрни иртрĕ. Ăна О.В.Антонова, Н.П.Архипова тата Г.М. Полякова учительницăсем йĕркелерĕç. Тунти кун 5-11 классенче вĕренекенсем актовăй залра вичкĕн (крылатые) сăмахсен тата фразеологизмсен "станцийĕнче" ăмăртрĕç. Ытлари кун вара 1-11 классем илемлĕ вулакансен конкурсĕнче тупăшрĕç. Юн кун пуçламăш классенче вĕренекенсем "Юмах - ултав, анчах унта _ систерỹ" конкурсра вырăс халăхĕн тĕрлĕ юмахĕсем тăрăх инсценировкăсем лартрĕç. Кĕçнерни кун 5-8 классем вырăс чĕлхипе тата литературипе çыхăннă ыйтусемпе хуравсен марафонĕнче вăй виçрĕç. Эрне кун вĕренекенсем литература геройĕсен балĕнче пулчĕç. Вĕренекенсем "Евгений Онегин" (А.Пушкин), "Ревизор" (Н.Гоголь), "Гроза" (А.Островский), "Война и мир" (Л.Толстой) тата ытти хăш-пĕр произведенисенчи литература персонажĕсене ĕненмелле те витĕмлĕн сăнласа пачĕç. Чечня Республикинче çар тивĕçне пурнăçласа пуç хунă Владислав Митрофанов офицера халалласа йĕркеленĕ электронлă материалпа та пурте кăсăкланса паллашрĕç. Кадетсен класĕнчи яшсемпе хĕрсем (çиччĕмĕшсем) бал ташшине питĕ илемлĕн ташласа кăтартрĕç. Балра çак класри Юлия Гордеевапа (Королева) Евгений Павлов (Король) та лайăхпа палăрчĕç.
Источник: "Шăмăршă хыпарĕ"