Публикации » Шăпа çырнине пăхмасăр

ПУРНĂÇРА каярах мĕн пуласса маларах пĕлсе çуралма май çук. Ку – пурнăç саккунĕ. Ярăславра пурăнакан А.Мордвинов та хăйĕн шăпи çапла çаврăнса тухасса кĕтмен пулĕ. Çирĕм иккĕре çеç-ха халĕ иккĕмĕш ушкăнри инвалид (каçартăр та, урăх сăмах çук).

– Ĕмĕтсем çав тери пысăкчĕ, – калаçăва аякран пуçларĕ вăл. – Такам та пулас килетчĕ...

Васанти вăтам шкултан ăнăçлă вĕренсе тухнă Александр. Алла аттестат илнипех çырлахасшăн пулман вăл, культура училищине ăнăçлă пĕтернĕ. Халĕ те пĕлĕвне малалла ÿстерет Саша – республикăри культура институтĕнче куçăмсăр майпа виççĕмĕш курсра вĕренет. Ку енĕпе унăн Турă пани пурах-тăр çав.

Килте амăшĕпе – Ираида Алексеевнăпа пурăнать йĕкĕт, кулленех район центрне ĕçе çÿрет. Ку уншăн пĕрре те ансат мар.

– Халăха ĕçпе тивĕçтерекен районти центра пысăк тав, – тет Александр Мордвинов. – Кăçалхи март уйăхĕнче В.Севрюгин предпринимателĕн ял хуçалăх техникин запас пайĕсене сутакан магазинра ĕç вырăнĕ тупма май килчĕ.

Ун ĕçĕпе предприниматель те кăмăллă.

– Ĕçе хăвăрт хăнăхса çитрĕ, – тет ун пирки В.Севрюгин. – Компьютерпа ĕçленисĕр пуçне клиентсен ыйтăвĕсене те туллин тивĕçтерме тăрăшать.