Публикации » Юратнă ĕç – пурнăç тĕллевĕ

Машина çине ларса çил ачипе ăмăртма мĕн пĕчĕкрен ĕмĕтленнĕ вăл. "Хурçă утпа" ака-суха ĕçĕсене тума та мăн çынлах шутланă, паллах... Çапла, çапла. Техника енне туртăнасси Васан арĕн Ю.Филипповăн ача чухнех пуçланнă.

Туслă кил-йышра çунат сарнă Юра пĕр ĕçрен те пăрăнман. Тырçи вăхăтĕнче тăван хуçалăха тырă сăвăрса тасатма пулăшнă, пăру кĕтĕвĕ кĕтнĕ. Ашшĕпе пĕрле ака-суха ĕçĕсене те хутшăннă. Çĕр ĕçĕ йывăр та пархатарлине ăнланнă каччă, хăй техникăшăнах çуралнине туйнă. Ахальтен мар, 9 класс пĕтерсен машинист-трактористăн III класлă правине алла илнĕ. Вăтам шкул хыççăн кунтах пĕр вăхăт трактористра тимленĕ. Пĕлÿ çуртне хутса ăшăтма вут-шанкă, брикет тата вĕрентекенсем валли ытти хатĕр турттарнă.

1980-1982 çулсенче Васан яшĕ Совет Çарĕнче тăнă. Службăна Германире ирттернĕ. Автомобиль çарĕнче пулнă май Юрий Филиппов бензовозпа, ЗИЛпа тĕрлĕ япала турттарнă. Тăрăшулăхшăн, пысăк яваплăхшăн тата çăмăл атлетика енĕпе çитĕнÿ тунăшăн чăваш каччин сăнне чаçри Хисеп хăмине кĕртнĕ.

Канăçсăр чĕреллĕскер, демобилизаци хыççăн, Юрий Филиппов вунă кунранах (!) Шăмăршă ВПКСМ райкомне ĕçе кĕнĕ. "Шемуршинский" совхоз "Гвардеецран" уйрăлсан, райком опытлă специалиста малтанхи хуçалăха куçарать. Çак тапхăрта шофер Çĕрпÿри совхоз техникумра куçăмсăр майпа пĕлĕвне ÿстерет, I класлă водитель пулса тăрать. Палăртни вырăнлă, ку категорипе ĕçлекен специалист çуккипе, "Сельхозхими" пĕрлешĕве "КАВЗ" маркăллă çĕнĕ атобус парсан Ю. Филиппова асăннă организацие куçараççĕ.

ЖКХра та тăрăшнă Юрий Владимирович. Кунта та пысăк квалификациллĕ специалист пулнă. Çĕнĕ автомашинăсем – УАЗпа КамАЗ шанса панă. Тĕп инженерта та ĕçленĕ Ю. Филиппов. Ĕçне кура – хисепĕ. Хастарлăхшăн район администрацийĕн Хисеп грамотисене тивĕçнĕ. Халĕ Юрий Владимирович – "Комунальникăн" ăста газооператорĕ. Çав хушăрах – предприниматель те. Юрий Владимировичпа Алевтина Анатольевнăн икĕ ачи пурнăçăн анлă çулĕ çине тухнă ĕнтĕ. Ашшĕ пекех, трактор-машинăпа тем тĕрлĕ ĕçе тума та пултараççĕ. Çав вăхăтрах хăйсен специальноçĕпе ĕçлесе ят-сум илме те ĕлкĕрнĕ.

"Юратнă ĕç пурнăç тĕллевне тупма пулăшрĕ, мĕн чухлĕ тус-юлташ парнелерĕ!" – тет тин кăна 50 çул тултарнă чăваш хастарĕ. Тĕрĕс, çын хăй ĕçĕпе ыттисене кирлĕ пулсан, вăл чăннипех те телейлĕ.