Публикации » Шыв, строительство ыйтăвĕсем – тимлĕхре

Ю.В. Ильин, патшалăх службин Атăлпа Вятка академийĕн Шупашкарти филиалĕн дипломне илнĕскер, 2011 çулхи октябрь уйăхĕнче Васан ял поселенийĕн пуçлăхĕн тивĕçĕсене вăхăтлăха пурнăçлама тытăннă. 2012 çулхи март уйăхĕнче ăна ял-йыш ял пуçлăхĕ пулма суйланă. Çак кунсенче пирĕн корреспондент çамрăк пуçлăхпа тĕл пулса калаçнă, ăна хăш-пĕр ыйтусем çине хуравлама ыйтнă.

– Юрий Валерьевич, эсир пĕлтĕр октябрьте чи малтан хăш ыйтупа ĕçлеме пуçларăр;

– Манăн ĕç-хĕл сĕм-тăлăха юлнă Евгений Сурков валли Ярăславра уйрăм çурт тăвассинчен пуçланчĕ. "Ашшĕ-амăшĕсĕр юлнă тăлăх ачасене социаллă пулăшу парассипе çыхăннă хушма гарантисем çинчен" Федераллă саккунпа тата Чăваш Республикин "Пурăнмалли çурт-йĕр тĕлĕшĕнчи хутшăнусене йĕркелесси çинчен" саккунĕпе килĕшÿллĕн сĕм-тăлăха юлнă ачасене 18 çул тултарнă хыççăн патшалăх шучĕпе çурт-йĕрпе тивĕçтермелле. Конкурсра çĕнтернĕ Шăмăршăри "Строитель" ООО Евгений Сурков валли силикат кирпĕчрен хăтлă çурт туса пачĕ. Унта пур условисем те пур. Строительсем çак ĕçе çĕнĕ çулчченех вĕçлерĕç. Кăçал çуркунне салтакран таврăннă Евгений Сурков çĕнĕ çуртшăн пире те, строительсене те ăшшăн тав турĕ. Кăçал Ярăславри Советская урамрах тепĕр тăлăх çамрăк валли çĕнĕ пÿрт тума пуçлатпăр.

– Ял поселенийĕн территорийĕнче "Таса шыв" программăпа ĕçлесси еплерех пырать;

– Пĕлтĕр кĕркунне, малтан пуçланă ĕçе малалла тăсса, Васанти тата Кивĕ Шăмăршăри урамсенче шыв пăрăхĕсем хывнă, колонкăсем лартнă. Çак ялсенчех çĕнĕ шыв башнисем çĕкленĕ. Пĕрлех пушар хăрушсăрлăх йĕркисемпе килĕшÿллĕн, ку ялсенче çĕр айне икшер пысăк емкоç вырнаçтарса лартса шыв тултарнă, люкĕсене хунă. Çакăн усси тÿрех сисĕнчĕ. Пĕлтĕр декабрĕн 30-мĕшĕнче Ярăславра алхасма пуçланă пушара сÿнтерме пушар чаçĕн ĕçченĕсем Васанти емкоçсенчи шывпа туллин усă курчĕç, вут çулне тÿрех пÿлсе хучĕç.

Кăçал шыв ыйтăвĕпе ĕçлесси малалла пырать. Ĕçсем вĕçленсе пыраççĕ ĕнтĕ. Пĕрлех строительсем лайăх пахалăхпа ĕçлеме тăрăшнине те асăнса хăварас килет. Васанта Элĕкри "Строитель" ООО бригади, Кивĕ Шăмăршăра "Альянс ВолгоСтрой" ООО бригади вăй хураççĕ.

– Малалла строительство ĕçĕсем пирки калаçар пулĕ.

– Кунта чи малтанах Васанти тĕп шкулта капиталлă юсав ĕçĕсем пынине палăртмалла. Конкурсра çĕнтернĕ май, шкулти ĕçсене Шăмăршăри "Строитель" ООО бригадисем пурнăçлаççĕ. Проектпа сметăри ĕçсен калăпăшĕ пĕр миллион та 500 пин тенкĕпе танлашать.

Ярăславри клубра та юсав ĕçĕсем пыраççĕ. Конкурсра çĕнтернĕ Шăмăршăри "Сувар" ООО бригади – куллен хĕрÿ ĕçре.

Икĕ объектра та ĕç пахалăхĕ – тивĕçлĕ шайра. Вĕсенчи ĕçсем вĕçленнĕпе пĕрех ĕнтĕ.

– Тирпей-илем пирки калас пулсан...

– Ку ыйтăва та куçран вĕçертместпĕр. Хăйсен çурчĕсен таврашне вĕлтĕрен-хупахран тасатман граждансене асăрхаттаратпăр. Хăш-пĕрисем çак ыйту çине алă сулни, паллах, пире питĕ пăшăрхантарать. Пĕр килĕ умĕнче хыт-хура ашкăрни те пĕтĕм урам илемне пăсать-çке-ха.

Шкулпа ача сачĕн йывăç картисене те çĕнететпĕр. Николай Краснов, Александр Ухваркинпа Евгений Смаев çак ĕçре тÿрĕ кăмăлпа ĕçленине палăртса хăварас килет.

– Çуллахи тапхăрти культурăпа спорт аталанăвĕ пирки кĕскен те пулин каласа параймăр-ши;

– Троица умĕн, шăмат кун, Кивĕ Шăмăршăри чиркÿпе клуб умĕнчи лапамра çак ялăн уявĕ пулчĕ. Ăна хаваслă та интереслĕ ирттерес тĕлĕшпе Чăваш Республикин тава тивĕçлĕ культура ĕçченĕ Герман Ларшников нумай тăрăшрĕ. Паллах, спонсорсем те тав сăмахĕсене тивĕçлĕ.

Халĕ мини-футболла выляса районта мала тухассишĕн пыракан ăмăртусенче пирĕн ял поселенийĕн «Колос» команди те вăй виçет. Унăн лайăх результачĕсем пире савăнтараççĕ.