Публикации » Ялти хисеплĕ ветеран

Ярăславри Е.Петрован тĕрленчĕкĕсем район хаçатĕнче тăтăшах пичетленеççĕ. Елена Петровна ытларах ялти хисеплĕ те ĕçчен çынсем çинчен çырса кăтартма кăмăллать. Вăл хăй те – ялти сумлă çынсенчен пĕри.

Елена Петрова (хĕр чухнехи хушамачĕ Сергеева) 1947 çулхи январĕн 14-мĕшĕнче Кивĕ Шăмăршă ялĕнче çуралнă. Хĕрача пĕчĕклех пĕлÿ патнелле туртăннă – ялти пуçламăш шкулта 4 класс пĕтерсен Шăмăршăри вăтам шкулта малалла вĕреннĕ. 1966 çулта 11 класс пĕтерсе аттестат илсен "Гвардеец" колхозра счетоводра ĕçлеме пуçланă.

Хăйĕн ĕçне юратса та тĕплĕн тăвакан, обществăлла ĕçсене хастар хутшăнакан хĕре часах колхозри комсомол комитечĕн секретарĕ пулма суйланă. Çамрăксемпе пĕрле тĕрлĕ мероприятисем нумай йĕркеленĕ Е.Сергеева. Хĕрÿ вырма тапхăрĕнче вара, ĕç хыççăн, çамрăксем йĕтем çинче, каçхи сменăра тăрăшнă. Хăйĕн профессилле пĕлĕвне ÿстересси пирки те манман мал ĕмĕтлĕ хĕр – "Гвардеец" колхозра экономистра ĕçленĕ хушăра заочнăй майпа Улатăрти ял хуçалăх техникумĕн бухгалтери уйрăмĕнче вĕреннĕ, 1972 çулта диплом илнĕ. 1971 çулта ял-йыш Елена Сергеевана райсовет депутатне суйланă. Депутат тивĕçне те тÿрĕ кăмăлпа пурнăçланă çамрăк экономист.

1973 çулхи январьте Елена Сергеева пурнăçĕнче пысăк улшăну пулса иртнĕ – вăл Ярăслав каччипе, районти шалти ĕçсен пайĕнче милици сотрудникĕнче вăй хуракан Николай Петровпа пĕр çемьене пĕрлешнĕ.

Çав çулах, ноябрьте, "Гвардеец" хуçалăхпа "Шемуршинский" совхоза пĕрлештерсе пысăклатсан Е.Петрова кунта бухгалтерта ĕçлеме пуçланă. Совхозра 7 çул тăрăшсан "Сельхозхимия" предприятири кадрсемпе ĕçлекен инспектор должноçне куçнă. 1993-1999 çулсенче – Васан ял администрацийĕн, кайран, тивĕçлĕ канăва тухичченех, районти санэпиднадзор центрĕн тĕп бухгалтерĕнче вăй хунă.

Ăçта ĕçлесен те, хăйĕн тивĕçне профессилле ăсталăхпа туса пынă Елена Петровна. Пархатарлă ĕçшĕн ăна нумай хутсен Грамотăсемпе, парнесемпе чысланă, "Ĕç ветеранĕ" хисеплĕ ят панă.

Мăшăрĕпе, Николай Сергеевичпа (вăл пенсие кайичченех милици сотрудникĕнче тăрăшнă), виçĕ ывăл ÿстерсе çитĕнтернĕ, вĕсене тивĕçлĕ воспитани парса, професси илме пулăшса пурнăç çулĕ çине кăларнă. Ачисем – ашшĕпе-амăшĕ пекех ĕçчен, ырă ятлă. Аслă ывăлĕ, Алексей, Кемерово хулинчи аслă çыхăну çар училищине пĕтернĕренпе службăра тăрать. Вăталăххи, Андрей, университет дипломне илнĕскер, тĕрлĕ регионсенче пысăк кĕперсем хывнă çĕрте инженер-строитель пулса ĕçлет. Кĕçĕнни те, Юрий, кĕперсем тунă çĕрте тăрăшать. Ывăлĕсем пурте – çемьеллĕ, хăйсен çурт-хваттерĕнче пурăнаççĕ. Петровсене виçĕ мăнук савăнăç кÿрсе тăрать.

Çак кунсенче Е.Петрова хăйĕн 65 çулхи юбилейне уявларĕ. Чаплă юбилей ячĕпе ăна çывăх çыннисемпе тăванĕсем ăшшăн саламларĕç, ырлăх-сывлăх, вăрăм ĕмĕр сунчĕç.