Публикации » Тăрăшуллă та хисеплĕ

АРÇЫН ачасем пĕчĕкренех техника енне туртăнаççĕ. Ярăславра пурăнакан Сергей Локтин та ашшĕ çумĕнче кабинăра ларса çÿреме кăмăлланă. Хушăран руль тытма тÿр килсен Сергейрен телейлĕреххи пулман та тейĕн.

Яш шутне кĕрсен маттур каччă Шăмăршăри вĕрентÿ камбинатĕнчен тракторист удостоверенине алла илсе тухнă. Вара "Сельхозхимия" предприятире ĕçлеме тытăннă. Çара кайиччен, 1991 çулччен, Канашра водителе вĕреннĕ. Салтак пăттине икĕ çул çинĕ хыççăн тăван яла таврăнать, малтанхи вырăнах ĕçе тухнă.

Вĕçен кайăк та мăшăрланса йăва çавăрать. Сергейăн та ялтах куç хывнă хĕрĕ пурăннă. Вĕсем Таньăпа пĕрлешсе тĕп килтен уйрăлса тухаççĕ. Кĕçех кивĕ çурт вырăнне çĕннине çĕклеççĕ. Паллах, çемьере йыш та хутшăнсах пырать. Локтинсем икĕ ывăлпа пĕр хĕр çитĕнтереççĕ, вĕсене тивĕçлĕ воспитани парассишĕн тăрăшаççĕ. Тĕпренчĕкĕсем хăйсем пекех маттур та пултаруллă, пĕчĕкренех ĕç çумне çыпăçнă. Ÿснĕçем ывăлĕсем ашшĕн, хĕрĕ амăшĕн пулăшуçи пуласса пĕр иккĕленмесĕрех калама пулать.

Кил-çурт таврашĕ те тирпейлĕ те илемлĕ вĕсен. Хуçалăхра кирлĕ пур япала та пур. Ялта тĕпленнĕрен Локтинсем выльăх-чĕрлĕх те тытаççĕ: ĕне, вăкăр, сурăхсем, чăх-чĕп, хур-кăвакал...

Килĕштерсе, пĕр-пĕрне хисеплесе пурăнакан Сергейпа Таньăран чăннипех те тĕслĕх илмелĕх пур. Çакнашкал çемьесем пулсан ялсем те ватăлмĕç.