19 апреля 2010 г.
ЯРĂСЛАВРА пурăнакан Иван Федоровичпа Валентина Леонтьевна Локтинсем виçĕ ывăл çуратса ỹстернĕ. Аслисем çар службинче пулса хăйсен тивĕçне тỹрĕ кăмăлтан пурнăçланă. Пĕлтĕрхи июнĕн 14-мĕшĕнче кĕçĕн ывăлĕ _ Вячеслав та салтак тумне тăхăннă. Вăл Украинăри Севастополь хулинче, тинĕс пехотинче службăра тăрать. Вячеслав Васанти вăтам шкулта вĕреннĕ чухнех спортпа туслă пулнă, çарта та сывлăхне çирĕплетсех пырать. Патвар та вăр-вар чăваш каччине командирсем те хисеплеççĕ, юлташĕсем те юратаççĕ. "Вячеслав Локтин рядовой Украина çĕрĕ çинче Раççей салтакĕн чыслă ятне çỹлте тытать", _ тесе çырнă командирсем хăйсен çырăвĕнче. "Украинăра чăнласах та илемлĕ, анчах тăван ял маншăн хаклăрах. Служба срокне вĕçлесе яла таврăнсан шофера вĕренсе тухасшăн", _ пĕлтерет ашшĕпе амăшне маттур салтак. Апрелĕн 9-мĕшĕнче Вячеслав Локтин вун тăххăр тултарса çирĕме пуснă. Çуралнă куну ячĕпе чунтан саламлатпăр сана, çамрăк ентешĕмĕр!
Источник: "Шăмăршă хыпарĕ"