04 марта 2010 г.
КИВĔ ШĂМĂРШĂ ялĕ спортăн тĕрлĕ енĕсемпе ăмăртса районĕпех паллă спортсменсемпе пуян. Хальхи вăхăтра çак ялта çуралса ỹснĕ, çĕршывăн тĕрлĕ кĕтесĕсенче пурăнакан вунна яхăн спорт мастерĕпе кандидачĕ шутланать. Тĕслĕх вырăнне Евдокимовсен, Куприяновсен, Дмитриевсен, Каргинсен, Антоновсен çемйисене илме пулать. Акă, сăмахран, Евдокимовсен çемйинех илер. Вĕсен аслă ывăлĕ, Владимир Александрович Евдокимов, хальхи вăхăтра Мускав облаçĕнчи Троицк хулинче пурăнаканскер, йĕлтĕрпе марафон дистанцийĕсене чупма кăмăллать. Вăл 50 çултан иртнĕ пулин те Раççейри тĕрлĕ хуласенче ирттерекен ăмăртусенче яланах хастар хутшăнать, хăйĕн ỹсĕмĕнчисем хушшинче чи лайăххисен шутĕнче пырать. Владимир Евдокимов _ Раççей хисеплĕ спорт мастерĕ. Унăн хĕрĕ, Олеся, шывра ишес енĕпе шкул ачисем хушшинче Мускав облаçĕн чемпионĕ. Ывăлĕ, Алексей, ашшĕпе пĕрле йĕлтĕрпе Киров, Санкт-Петербург, Дубна, Красноярск хулисенче иртнĕ марафон ăмăртăвĕсене хутшăннă. В.Евдокимовăн шăллĕ Николай та шкулта вĕреннĕ чухнех йĕлтĕрпе чупас енĕпе темиçе хутчен те район чемпионĕн ятне çĕнсе илнĕ. Унăн ывăлĕ, Максим, ухăпа тĕл перес енĕпе Раççей чемпионĕ, Европа чемпионачĕсен призерĕ пулнă. Тĕнче класлă спорт мастерĕ хальхи вăхăтра Тольятти хулинче пурăнать. Тепĕр Евдокимов _ Анатолий Петрович _ чупас енĕпе СССР спорт мастерĕ. Çапла, Кивĕ Шăмăршă ялĕ Евдокимовсен çемйипе чăннипех те мухтанма тата мăнаçланма пултарать. Çакна та палăртса хăвармалла: мĕн ачаранах спортпа туслашнă Евдокимовсем тăван Кивĕ Шăмăрша та манса каймаççĕ, май килсенех яла килсе тĕрлĕ ăмăртусем йĕркелеме хастар хутшăнаççĕ, спонсор пулаççĕ. Çĕршыв Хỹтĕлевçисен кунĕ умĕн Кивĕ Шăмăршăра ирттернĕ йĕлтĕрçĕсен ăмăртăвĕнче те çаплах пулчĕ. Ку хутĕнче ялти йĕлтĕрçĕсен ăмăртăвне Çĕршыв хỹтĕлевçисен кунне тата Канадăра иртекен XXI хĕллехи Олимпиадăна халалласа ирттерчĕç. Ăна Васан ял тăрăхĕн администрацийĕпе "Единая Россия" партин Кивĕ Шăмăршă ялĕнчи пуçламăш уйрăмĕ тата Евдокимовсен çемйисем йĕркелерĕç. Çанталăк шартлама сивĕ тăнине пăхмасăр, йĕлтĕрпе марафон чупас енĕпе Раççей хисеплĕ спорт мастерĕн Владимир Евдокимовăн призĕсене çĕнсе илессишĕн ăмăртăва çитмĕле яхăн йĕлтĕрçĕ старта тухрĕ. Çакна та палăртмалла: ăмăртăва Кивĕ Шăмăршă яш-кĕрĕмĕпе пĕрле Ярăслав, Васан, Çĕнĕ Шăмăршă, Виçпỹрт Шăмăршă тата Шăмăршă çамрăкĕсем те хутшăнчĕç. Çакă та кăсăклă: йĕлтĕр йĕрĕ çине тăнисен шутĕнче чи çамрăкки _ 5 çулта, чи асли вара утмăла çывхараканскер пулчĕ. Ăмăртăва чи малтан кĕçĕн классенче вĕренекенсем пуçларĕç. Ку ушкăнра М.Урмаев, Р.Егоров, Е.Ларшникова вĕренекенсем палăрчĕç. Иккĕмĕш ушкăнпа вăтам тата аслă классенче вĕренекенсем ăмăртрĕç. А.Гладков, М.Гладков, П.Драгунов (виççĕшĕ те Шăмăршăран), Д. Ефимов (Çĕнĕ Шăмăршă), Е.Гордеев (Васан), А.Ларионова (Шăмăршă), В.Удина (Шăмăршă) малти вырăнсене пайларĕç. Хĕрачасемпе хĕрарăмсем хушшинче вара И.Яковлева (Ярăслав), Е.Батрова (Шăмăршă), А.Мульдюкова (Виçпỹрт Шăмăршă), М. Удина (Шăмăршă), В.Тихонова (Ярăслав), Н.Давыдова (Ярăслав) дистанцие лайăх кăтартусемпе вĕçлерĕç. Яшсемпе арçынсен ушкăнĕнчи кĕрешỹ уйрăмах çивĕч иртрĕ. А.Миронов (Шăмăршă), А.Кузьмин, А.Савельев (Виçпỹрт Шăмăршă), О.Парфенов (Ярăслав), А.Антонов, Д.Антонов (Кивĕ Шăмăршă) ыттисенчен вăйлăрах чупнипе палăрчĕç. Хĕрĕх çултан иртнисенчен вара А.Каргин (Кивĕ Шăмăршă), В.Павлов (Çĕнĕ Шăмăршă), Н.Краснов (Кивĕ Шăмăршă) йĕлтĕрçĕсем финиша пуринчен те маларах çитрĕç. Ăмăртусем каç енне сулăнаспа тин вĕçленчĕç. Кивĕ Шăмăршăсем ентеш призĕсемшĕн ирттернĕ йĕлтĕрçĕсен ăмăртăвне курма йышлăн тухни ял çыннисем спорт ăмăртăвĕсемпе питĕ интересленнине çирĕплетет. Ăмăрту кăтартăвĕсене ялти клубра, савăнăçлă лару-тăрура пĕтĕмлетрĕç. Ăмăртусенче кашни ушкăнрах малти виçĕ вырăна тухнă йĕлтĕрçĕсене В.Евдокимов ятĕнчен хатĕрленĕ ылтăн, кĕмĕл тата бронза медальсемпе, Дипломсемпе тата асăнмалăх призсемпе наградăларĕç. Кунсăр пуçне йĕлтĕр йĕрĕ çине тăнă ăмăртусен кашни участникнех асăнмалăх парнесем парса чысларĕç. (Хăй шутĕнчен 70 приз туянса илсе килнĕ В.Евдокимов.) Уйрăмах пысăк пуçарулăх тата хастарлăх кăтартнă йĕлтĕрçĕсемпе ăмăрту йĕркелỹçисем "Единая Россия" партин районти уйрăмĕн Тав çырăвне тивĕçрĕç. Ялти физкультурăпа спорт ĕçне йĕркелес тĕлĕшпе пысăк пуçарулăх кăтартнăшăн Васан ял тăрăхĕн пуçлăхне В.Ястребова ăмăртăва хутшăннисем тав сăмахĕсем каларĕç. Палăртса хăварар, тав сăмахĕсене ăмăртусен тĕп судйи, Кивĕ Шăмăршăра çуралса ỹснĕ, хальхи вăхăтра Шăмăршăри вăтам шкулта физкультура учителĕ пулса ĕçлекен Н.Куприянов, "Единая Россия" партин ялти пуçламăш уйрăмĕн секретарĕ И.Ендиерова тата ял активĕ те тивĕçлĕ. Ял çыннисем тата ăмăртусене хутшăнакансем çавăн пекех Çăварни пĕлĕмĕпе техĕмлĕ чей тата тутлă какай шỹрпи пĕçерекенсене те ăшшăн тав турĕç. Кивĕ Шăмăршăра иртнĕ йĕлтĕрçĕсен ăмăртăвĕ ял хавалĕ чăннипех те çирĕп сывлăхшăн пулнине тепĕр хут ĕненмелле çирĕплетсе пачĕ.
Источник: "Шăмăршă хыпарĕ"