Публикации » Ятлă çынна ял савать

о Сывлăха сутăн илеймĕн

Ятлă çынна ял савать

Таса, ырă чунлă, чунĕпе илемлĕ тетпĕр эпир лайăх та сапăр çын çинчен. Çакăн пек çын вăл - районти тĕп больницăри стоматологи уйрăмĕнче аслă медсестрара вăй хуракан Надежда Семеновна Иванова.

Надежда - Патти хĕрĕ. 1986 çулта Чупайри вăтам шкула пĕтерсенех Канашри медицина училищине вĕренме кĕрет. 1988 çулта пĕлỹ илнĕ çамрăк специалиста Красноармейски тăрăхне ĕçлеме яраççĕ. Çав çулах пĕр ялта çуралса ỹснĕ Юрий Олегович Ивановпа мăшăрланса çемье çавăраççĕ. Вăл Вăрмара ĕçлеме килет. Малтан стационарта вăй хурать, кайран - стоматологине куçать.

Вунсаккăрмĕш çул ĕнтĕ хăйĕн юратнă ĕçĕнче тăрăшать.

Уçă кăмăллă медсестран ырă сăмахĕ пурне те илĕртет. Пĕрле ĕçлекенсем унран пĕр сивĕ сăмах та илтсе курман. Вĕсемпе пĕр чĕлхе тупма тăрăшать.

Шăл сиплекен кабинета пыракан пур çынпа та вăл ăшшăн калаçать, яланах тарават йышăнать.

Пĕчĕкрен ĕçлеме хăнăхнă хĕр ĕçсĕр ларма юратмасть: тĕрлĕ отчетсем, табель-графиксем тăвать, медикаментсем йышăнать.

Вĕсен стоматологи уйрăмĕнче яланах таса, тирпейлĕ, йĕри-тавра чечексем илем кỹреççĕ.

Таса чунлă çыннăн ĕçĕ те пархатарлă. Хăйĕн пĕлĕвне ỹстерме тăрăшать, спорт ăмăртăвĕсене хутшăнма хастар, районти тĕп больница чысне республикăра темиçе хут та хỹтĕленĕ. Ĕçне кура хисепĕ теççĕ ваттисем. Район больници ăна Хисеп хучĕсем, парнесем парса чысланă.

Надежда Ивановăн 2 ача çитĕнет. Асли, хĕрĕ амăшĕн çулне суйласа илнĕ. 2 çул ĕнтĕ Канашри медицина училищинче вĕренет. Кĕçĕнни - 7-мĕш класра ăс-тăн пухать.

Малашне те Надежда Ивановăна ăнăçусем сунатпăр. Çакăн пек çынсем пирĕн пурнăçра ытларах пулсан аванччĕ.

А. НИКОЛАЕВА.