Публикации » Коррупци теми актуаллă

Район администрацийĕн ларусен залĕнче районта коррупцие хирĕç кĕрешессипе еплерех ĕçсем туса ирттернине сÿтсе явассипе районти право йĕркине сыхлакан органсен координаци канашлăвĕ иртнĕ.

Ăна район прокурорĕ Е.Краснов ертсе пынă. Канашлăва çавăн пекех район прокурорĕн заместителĕ Г. Демьянов, РФ ШĔМĕн муниципалитетсем хушшинчи «Урмарский» уйрăмĕн начальникĕ И.Константинов, РФ ШĔМĕн муниципалитетсем хушшинчи «Цивильский» уйрăмĕн экономика хăрушсăрлăхĕпе коррупцие хирĕç кĕрешекен уйрăм начальникĕ Д.Батрынча, РФ следстви комитечĕн ЧР следстви управленийĕн районсем хушшинчи Çĕрпÿри следстви уйрăмĕн руководителĕ Д.Каргин, район администрацийĕн организаципе контроль ĕçĕсен пайĕн начальникĕ Н.Павлов, район администрацийĕн пуçлăхĕн заместителĕсем, ял тăрăхĕсен пуçлăхĕсем хутшăннă. Тĕп докладпа район прокурорĕн заместителĕ Г.Демьянов тухса калаçнă.

Прокуратура ĕçченĕсем коррупци сĕмĕллĕ преступленисене тупса палăртассипе пĕрре кăна мар вырăнти хăй тытăмлăх органĕсенче, медицина, вĕрентÿ учрежденийĕсенче тĕрĕслевсем ирттернĕ, право хуралĕн ĕçĕ-хĕлне пĕтĕмлетсе тишкерÿ тунă.

«Тишкерÿ туса пĕтĕмлетнĕ хыççăн çакна палăртнă: коррупци енĕпе суда 2012 çулта пĕр ĕç те тăратман. Суда ĕçсем тăратасси вара пирĕн пĕтĕмĕшле ĕç-хĕл результачĕ», - палăртрĕ Г.Демьянов. РФ ШĔМĕн «Урмарский» уйрăмĕн начальникĕ И.Константинов хăй енчен паянхи куна коррупци теми актуаллă пулнине, «Урмарский» уйрăмăн çак енĕпе тунă преступленисене тупса палăртассипе çитменлĕхсем пуррине, малашне тухăçлăрах ĕçлемеллине палăртнă.

Район прокурорĕ коррупцие хирĕç тăрассипе право йĕркине сыхлакан, вырăнти хăй тытăмлăх органĕсен умĕнче тăракан тĕллевсене палăртнă.