Публикации » Кăмăлĕпе ырă, ĕçре хастар

«Çĕр çинче çĕр-çĕр тĕрлĕ професси, анчах та маншăн чун туртни пĕрре кăна - шут ĕçĕ пулчĕ», - тет райпо системинче бухгалтер пулса чылай çулранпа тăрăшакан Светлана Николаевна Васильева.

Вăл 1958 çулхи январĕн 15-мĕшĕнче Арапуç ялĕнче çуралнă. Шăпа ăна Чупай ялне илсе çитернĕ. Мĕн ачаран ĕçпе пиçĕхсе ÿснĕ вăл. Кил-тĕрĕшре яланах пулăшса тăнă. Чупайĕнчи вăтам шкултан вĕренсе тухсан тÿрремĕнех Шупашкарти коопераци техникумне пĕлÿ пухма кĕрет. Унтан ăнăçлă вĕренсе тухса алла диплом илсен Вăрмар райпо системинче вăй хума тытăнать. Малтанласа Энĕшпуçĕнчи ваккăн суту-илÿ тăвакан пĕрлешĕвĕн бухгалтерĕ пулса ĕçлет. Унтан шут учĕчĕн бухгалтерĕнче вăй хурать. 1999 çулта пĕрремĕш категориллĕ бухгалтер пулса тăрать. 2005 çултанпа вара тĕп бухгалтерăн заместителĕнче тăрăшать. Унăн ĕç стажĕ райпо системинче 35 çул. Хăйĕн ĕçне яланах тÿрĕ кăмăлпа, пысăк ăсталăхпа пурнăçласа пырать Светлана Николаевна. Коллектив умĕнче те вăл пысăк хисепре. Пултаруллă бухгалтер çамрăксен наставникĕ те. Ĕçре пысăк ÿсĕмсем тунăшăн «Раççей потребкооперацинче тÿрĕ кăмăлпа ĕçленĕшĕн» паллăна, «Чăваш Республикин потребительсен кооперацийĕн ĕç ветеранĕ», «Раççей потребительсен кооперацийĕн ĕç ветеранĕ» хисеплĕ ятсене тивĕçнĕ. Çавăн пекех ăна РФ Центросоюз, Чăвашпотребсоюз, район администрацийĕн, Вăрмар райповĕн Хисеп грамотисемпе, Тав çырăвĕсемпе пĕрре кăна мар наградăланă.

Светлана Николаевна мăшăрĕпе Геннадий Петрович Васильевпа çемье çавăрса 3 ача çитĕнтерсе пурнăçăн анлă çулĕ çине кăларнă. Пурте вĕсем аслă пĕлÿллĕ. Ĕçре пултарулăхпа палăрнипе пĕрлех çемье ăшшине те упраса пырать маттур хĕрарăм. Мĕн тĕрлĕ апат-çимĕç хатĕрлеме пĕлмест пулĕ! Пĕр-пĕр ăста поварпа танах тесен те йăнăш пулмĕ. Мăшăрĕпе пĕрле кашни çул пахча çимĕç те тухăçлă çитĕнтереççĕ. Геннадий Петрович та ăста алăллă специалист. Вăл йывăçран, тимĕртен кил тĕрĕшре кирлĕ япаласем ăсталама маçтăр. Пĕр сăмахпа каласан вĕсем - чăн-чăн пурнăç çыннисем. Малашне те çавăн пекех хастар та маттур, пултаруллă, çынна яланах пулăшма хатĕр пулма сунатпăр, ĕçĕрсем ăнса пыччăр, çемьере татулăх хуçалантăр.