Публикации » Халăхпа курса калаçмалли чылай

Районта иртнĕ информаци кунĕн темисем çаксем пулчĕç: Раççей Президенчĕ В.Путин Федераллă Пухăва янă Çырăвĕн тĕп положенийĕсем; ĕç пурнăçлакан влаç тата вырăнти хăй тытăмлăх органĕсен халăх пурăнакан вырăнсенче пушар хăрушсăрлăхĕн мерисене вăйлатмалли тĕллевĕсем; 2013 çулхи январĕн 1-мĕшĕнчен пуçласа Чăваш Республикинче универсаллă электрон карттисене вăя кĕртесси; ЧР Президенчĕн 2007 çулхи 97 номерлĕ «Чăваш Республикинче ялти культура учрежденийĕсене аталантармалли мерăсем çинчен» Хушăвне пурнăçласси.

Информаци кунĕ шайĕнче района ЧР гражданла оборонăпа чрезвычайлă лару-тăрăвăн Патшалăх комитечĕн председателĕ В.Петров ертсе пыракан ушкăн çитнĕ. Ушкăн йышĕнче Федераллă казначействăн Чăваш Республикинчи Управленийĕн руководителĕн заместителĕ С.Кудряшов, РФ Пенси фончĕн Чăваш Республикинчи уйрăмĕн управляющийĕн заместителĕ Т.Дроздова, РФ ШĔМĕн экономика хăрушсăрлăхĕпе коррупцие хирĕç кĕрешекен управлени начальникĕ В.Плотников, ЧР строительство, архитектура, пурăнмалли çурт-йĕрпе коммуналлă хуçалăх министрĕн заместителĕ И.Новиков, Чăваш Республикинчи чĕрчунсене тата вĕсем пурăнакан вырăнсене сыхлассипе, тĕрĕслесе тăрассипе, усă курса йĕркелессипе ĕçлекен Патшалăх службин руководителĕ В.Кузюков, Çыхăнупа информаци технологисене тата массăллă информаци хатĕрĕсене надзор тăвассипе ĕçлекен федераллă службăн республикăри Управленийĕн руководителĕн заместителĕ Т.Евдокимова пулнă.

Чулкас. ЧР гражданла оборонăпа чрезвычайлă лару-тăру енĕпе ĕçлекен Патшалăх комитечĕн председателĕ В.Петров, Федераллă казначействăн Чăваш Республикинчи Управленийĕн руководителĕн заместителĕ С.Кудряшов тата район администрацийĕн пуçлăхĕ К.Никитин Чулкас ял тăрăхĕнче пулнă май Вăрмар райпо лавккинче «АККОНД» кондитер изделийĕсен уйрăмне уçнă çĕрте пулчĕç. Кунта фабрика туса кăларакан продукцийĕн тулли ассортименчĕ пур.

Чулкассемшĕн çакă чăн-чăн Çĕнĕ Çулхи парне пулчĕ темелле. Информушкăн членĕсем фабрика продукцийĕ çÿллĕ шайра пулнине тепĕр хутчен палăртрĕç. Унтан вĕсем ял халăхĕпе культурăпа кану çуртĕнче тĕл пулчĕç, тĕп ыйтусене сÿтсе яврĕç. Константин Владимирович йывăр пурнăç условийĕсене пăхмасăрах Чулкас ял тăрăхĕ аталанса пынине, В.Путин Федераллă Пухăва янă Çырăвне сÿтсе явнă май лайăх пурăнас тесен лайăхрах ĕçлемеллине, паха пĕлÿ илсе тивĕçлĕ професси алла илмеллине каларĕ. Вениамин Иванович Чулкасри культурăпа кану çурчĕн директорне А.Игнатьевăна сцена çине тухмалли костюмсем, тумтир, компьютер тата сасă вăйлатакан, çутă паракан, видеопроекци оборудованийĕ илмелли 500 пин тенкĕлĕх свидетельство пачĕ. Каласа хăвармалла: республикăри конкурса хутшăннă 18 çĕнтерÿçĕрен икĕ çĕнтерÿçи пирĕн районтан пулнă. Чулкасри тата Чупайĕнчи культура çурчĕсем. Культура çурчĕн директорĕ А.Игнатьева нумай тав сăмахĕсем каларĕ. В.Петров Çĕнĕ Çулхи уявсем, умĕн, уяв кунĕсенчи канмалли кунсенче уйрăмах асăрхануллă пулмаллине палăртрĕ. Статистика кăтартăвĕсем тăрăх Раççейре, республикăра шăпах декабрь, январь уйăхĕсенче пушар тухас хăрушлăх пысăк. Вăрмар районĕнче юлашки 5 çулта пушарсен шучĕ чакса пыни палăрать, анчах та вут-çулăмра кăçал 7 çын пурнăçĕ татăлнă. Инкексен тĕп сăлтавĕ - ÿсĕрле пирус туртни. Çавăнпа та Вениамин Петрович ялта пурăнакансене инкекрен сыхланмалли мерăсене йышăнмалли пирки, ял тăрăхĕсен пуçлăхĕсен полицин участокри уполномоченнăйĕсемпе, пушар хăрушсăрлăхĕн инспекторĕсемпе пĕрле ял çыннисене пушар хăрушсăрлăхĕн правилисене тепĕр хут аса илтермелли çинчен асăрхаттарчĕ. Çавăн пекех вăл ял халăхне универсаллă электрон карттипе еплерех усă курмалли пирки ăнлантарчĕ. Çак çĕнĕлĕхе алла илес мар текенсен заявлени çырса памалла.

Федераллă казначействăн Чăваш Республикинчи Управленийĕн руководителĕн заместителĕ С.Кудряшов В.Путин Федераллă Пухăва янă Çырăвĕ питĕ анлă та тишкерÿллĕ пулнине палăртрĕ. Тĕп шухăшĕ - «Пирĕн ăнăçлăх йăлтах хамăр алăра». РФ Президенчĕ Çырура ытларах активлă, тĕрлĕ проектсене пурнăçа кĕртекен çынсем çине тимлĕх уйăрмалла, шанмалла тесе пĕлтернине сÿтсе яврĕ. Сергей Владимирович агропрмышленность ыйтăвĕсем çинче те чарăнса тăчĕ. Çĕршывĕпех çĕрпе тухăçлă усă курмалли пирки асăнчĕ, ял çыннисене Раççейĕн активлă гражданĕсем пулма сунчĕ. Информаци кунне районти культура ĕçченĕсен савăнăçлă концерчĕ, фойере хатĕрленĕ ал ĕç ăстисен куравĕсем хăйне евĕрлĕ сĕм кĕртрĕç.

Ĕçлĕ ушкăн çавăн пекех Чулкасри пĕтĕмĕшле пĕлÿ паракан тĕп шкул коллективĕпе те тĕл пулса калаçрĕ. Информушкăн членĕсемпе вĕрентекенсем паянхи вĕрентÿ системинчи çĕнĕлĕхсене, йывăрлăхсемпе çитменлĕхсене хĕрÿллĕн сÿтсе яврĕç. Шăпах вĕрентекенсем ялти чи анлă тавра курăмлă çынсем, çынна мĕн ачаран тĕрĕс воспитани парса çитĕнтерекенсем. Çавна майăн вĕсене паянхи учителĕн социаллă статусĕ, ĕç укçийĕ, шкула укçа-тенкĕпе тивĕçтерес ыйтусем кăсăклантарчĕç. Хăнасем вĕрентекенсен ыйтăвĕсене шута илсе çывăх вăхăтра татса пама шантарчĕç, шкул пурнăçĕнчи çивĕч ыйтусем умĕнче куç хупманнишĕн, активлă пулнăшăн тав турĕç.

ЧР гражданла оборонăпа чрезвычайлă лару-тăру енĕпе ĕçлекен Патшалăх комитечĕн председателĕ В.Петров, райадминистраци пуçлăхĕ К.Никитин Вăрмарти 39 номерлĕ пушар чаçĕнче пулса кунти лару-тăрупа паллашрĕç.

Чупай ял тăрăхĕ. Т.Дроздова ертсе пыракан ушкăн Чупайĕнчи Культура çуртĕнче, пĕтĕмĕшле пĕлÿ паркан тĕп шкулта пулса курчĕ. Ĕçлĕ ушкăна Культура çурчĕн ĕçченĕсем, вĕрентекенсем савăнăçлă юрă-кĕвĕпе кĕтсе илчĕç. Пысăк Енккассинчи фольклор ушкăнĕ хăйĕн илемлĕ юррисемпе хăнасене тыткăна илчĕ. Чупайсем хăнасене кĕтсе илме тĕплĕн хатĕрленнĕ. Фойере ал ĕç ăстисен куравне йĕркеленĕ. Вĕсемпе те паллашма тÿр килчĕ информушкăн членĕсен. Культура çуртĕнчех вырнаçнă «Светлана» тулли мар яваплă обществăн филиалĕнче пулса унти ĕç-хĕлпе тĕплĕн паллашрĕç. Ял çамрăкĕсене ĕç вырăнĕсемпе тивĕçтерес тĕллевпе уçнă ăна. Хальхи вăхăтра кунта çамрăк çĕвĕç-хĕрарăмсем тăрăшса вăй хураççĕ. Унтан ĕçлĕ ушкăн вырăнти ял халăхĕпе тĕл пулчĕ. Чи малтанах асăннă ял тăрăхĕн пуçлăхĕ В.Андреев тухса калаçрĕ. Вăл ял тăрăхĕн социаллă пурнăç аталанăвĕ çинче тĕплĕн чарăнса тăчĕ, малашлăх задачисене палăртрĕ. Район пуçлăхĕ М.Пуклаков Пĕрлехи информаци кунĕн тĕп темисемпе паллаштарчĕ. Раççей Президенчĕ В.Путин Раççей Федерацийĕн Федераллă Пухăвне янă Çырăвĕн тĕп задачисем çинче чарăнса тăчĕ.

РФ Пенси фончĕн Чăваш Республикинчи уйрăмĕн управляющийĕн заместителĕ Т.Дроздова республикăн экономика аталанăвĕпе социаллă пурнăçĕпе паллаштарчĕ. Çавăн пекех пирĕн республикăра халăхăн социаллă пурнăç условийĕсене лайăхлатас тĕлĕшпе тĕрлĕ программăсем ĕçленине палăртрĕ. Юлашки çулсенче Амăшĕн капиталĕ çамрăк çемьесене чылай пулăшу кÿнине палăртрĕ. Пенси фондĕнче пулса иртекен çĕнĕлĕхсемпе те паллаштарчĕ. Чăваш Республикинчи ялти Культура учрежденийĕсене модернизацилесси çинчен калакан программăпа килĕшÿллĕн 2012 çулта Чупайĕнчи Культура çурчĕ пурлăхпа техника базине вăйлатма 500 пин тенкĕлĕх грант çĕнсе илнĕ. Çавна май Т.Дроздова Культура ĕçченĕсене саламласа свидетельство пачĕ. Асăннă программăпа килĕшÿллĕн Чупайĕнчи Культура çурчĕ пурлăхпа техника базине пуянлатрĕ. çак паллă пулăма халалласа савăнăçлă концерт пулчĕ. Вырăнти халăха Арапуçĕнчи, Кĕтеснерти, Пысăк Енккассинчи Культура çурчĕсен ĕçченĕсем, Чупайĕнчи ача садне çÿрекенсем, шкулта пĕлÿ пухакансем савăнăçлă концерт лартса пачĕç.

Информушкăн çавăн пекех Чупайĕнчи пĕтĕмĕшле пĕлÿ паракан тĕп шкулта пулса унти ĕç-хĕлпе тĕплĕн паллашрĕ, кунти тавра пĕлÿ музейĕнче пулса курчĕ, вĕрентекенсен ĕç коллективĕпе тĕл пулчĕ. Ĕçлĕ ушкăн Пĕрлехи информаци кунĕн тĕп темисемпе паллаштарчĕ, пенси темипе çыхăннă ыйтусем çинче тĕплĕн чарăнса тăчĕ. Информушкăн вĕренекенсен урокĕсенче те пулса курчĕ, шкулти спорт çитĕнĕвĕсемпе паллашрĕ.

В.Кузюков ертсе пыракан ушкăн Кивĕ Вăрмар ял тăрăхĕнчи вăтам шкулта, почта çыхăнăвĕн уйрăмĕн филиалĕнче пулса курчĕç, вĕсенчи ĕç коллективĕсемпе тĕл пулчĕç. Информушкăн членĕсем Пĕрлехи информци кунĕн тĕп темисемпе паллаштарчĕç, ыйтусем çине хуравларĕç.

Пĕрлехи информаци ушкăнĕн яваплă çыннисем информаци кунĕн результачĕсене райадминистрацинче пĕтĕмлетрĕç.