Публикации » Александр Линга призĕсемшĕн тупăшрĕç

Шкул ачисен ăс-тăнне тата пултарулăх аталанăвне хавхалантарас, сывă пурнăç йĕркине йăлана кĕртес, спортпа туслашассине çирĕплетес тĕллевпе Чупай ялĕнче çуралса ÿснĕ, Афганистан çĕрĕ çинче ĕмĕрлĕхех пуçне хунă А.Линга воин-интернационалиста асăнса Чупайри пĕтĕмĕшле пĕлÿ паракан тĕп шкул çăмăл атлетсен кросне ирттерчĕ.

Ăна Аслă Çĕнтерÿ тунăранпа 66 çул тата Космонавтика çулне халалларĕç. Кроса хутшăннисене район администрацийĕн пуçлăхĕ К.Никитин, райадминистрацин вĕрентÿпе çамрăксен политикин пайĕн начальникĕ Ю.Соколов,ЧР Çар ĕç комиссариачĕн Куславкка тата Вăрмар районĕсен пай пуçлăхĕ М.Пуклаков, Чупай ял тăрăхĕн пуçлăхĕ В.Андреев, асăннă ялти пĕтĕмĕшле пĕлÿ паракан тĕп шкул директорĕ А.Димитриев, Чăваш Республикинчи афганец-ветерансен союзĕн представителĕ А.Тимофеев отставкăри подполковник хутшăнчĕç.

Ăмăртăва Чупайри пĕтĕмĕшле пĕлÿ паракан тĕп шкулăн физкультура вĕрентекенĕ А.Ноздрин уçрĕ: шкул директорне А.Димитриева спортсменсем ăмăртăва хатĕрри çинчен пĕлтерчĕ. Пухăннисене район администрацийĕн пуçлăхĕ К.Никитин саламларĕ. «Сывлăхлă ача - çĕршыв тĕрекĕ, хÿтлĕхĕ. Сывлăхлă пулас тесен вара физкультурăпа тата спортпа туслă пулмалла. Район администрацийĕ халăха массăллă спорта явăçтарас тата çамрăк ăрăва ырă, сывă пурнăç йĕркине тытса пыма пулăшас енĕпе чылай ĕçсем туса ирттерет. Вĕсенчен пĕри район, республика шайĕнчи тĕрлĕ спорт тупăшăвĕсем йĕркелени. Пирĕн тăрăхри çамрăксем унччен маларах та спортри çитĕнÿсемпе республика, Раççей шайĕнче палăрнă. Паян та вĕсен йышĕ хушăнса пырасса шанатăп, сире пурне те пысăк çитĕнÿсем тума çирĕп сывлăх сунатăп», - терĕ Константин Владимирович.

Соревновани пуçланас умĕн А.Линга паттăра халалласа асăну хăми уçрĕç. Часах ăмăрту пуçланчĕ. Унта 12 шкултан 200 яхăн спортсмен тупăшрĕ.