Публикации » Çĕнелет фельдшерпа акушер пункчĕ

Республикăра пурнăçлакан «Сывлăх» наци проектне пурнăçа кĕртни сывлăха сыхлас ĕç кăтартăвĕсене палăрмаллах лайăхлатма май пачĕ. Пĕтĕмĕшле практика институчĕ паян çемьене, пациент миçе çултине пăхмасăр тĕрлĕ йышши медицина тата социаллă малтанхи пулăшу парать.

Пĕтĕмĕшле практика врачĕ çемье врачĕ пулса тăчĕ. Çакă ялта пурăнакансемшĕн уйрăмах вырăнлă, мĕншĕн тесен çĕнĕ тытăма пурнăçа кĕртнĕ хыççăн вĕсем хăйсем пурăнакан, ĕçлекен вырăнтах, вăхăтне тата укçи-тенкине перекетлесе врачăн пулăшăвне илме пултараççĕ. Юлашки çулсенче ялти фельдшерпа акушер пункчĕсене пысăк тимлĕх уйăрни вырăнта пурăнакансемшĕн уйрăмах пысăк пĕлтерĕшлĕ. Ялти ватă çынсенчен ытларахăшĕ унта сипленме çÿреççĕ. Эппин паян вĕсене май пур таран упраса хăварма тăрăшмаллах. Çак тĕллеве пурнăçласа Чупайĕнчи фельдшерпа акушер пунктне хальхи вăхăтра çĕнетес ĕç пырать. Кунти сывлăх сыхлавĕн пункчĕн çивиттине витнĕ, шал енчен те, тул енчен те штукатурка ĕçĕсене пурнăçланă, сăрланă. Çавăн пекех ăшă паракан пăрăхсене улăштарнă, урайне бетон сарнă. Кунта кĕмешкĕн çенĕк (тамбур) тунă. Ăна пурнăçлаканĕ - «Урмарская» коллективлă строительство организацийĕ» акционерсен хупă обществи. Çитес вăхăтра тараса чавма, йĕри-тавра тимĕр карта тытма, çут çанталăк газĕ кĕртме планлаççĕ. Вăл вара пĕтĕмĕшле практика врачĕн офисĕнчен пĕрре те кая пулмасть.

Пĕтĕмĕшле каласан, ялти медицина системине çĕнетес тĕлĕшпе пысăк ĕçсем туса ирттереççĕ.

Чупай тата Патти ялĕсенче пурĕ 171 ватă çын пурăнать. Вĕсене вырăнта медицина пулăшăвĕ парассипе хальхи вăхăтра С.Васильева медицина ĕçченĕ тăрăшса вăй хурать. Светлана Михайловна Канашри медицина училищинчен вĕренсе тухсан тÿррех тăван яла - Чупайне - таврăнать, кунта фельдшер пулса ĕçлеме тытăнать. Ялта çамрăк специалистсем тĕпленсе ĕçлени ун инфратытăмне аталанма нумай енлĕ майсем туса парать.