28 ноября 2013 г.
«Восславим женщину» республикăн виççĕмĕш фестивалĕн пĕтĕмлетÿ тапхăрне иртнĕ эрне кун чи пултаруллă, чи черчен, чи илемлĕ те ăшă кăмăллă хĕрарăмсем - район тата хула конкурсĕсенче палăрнă маттур пикесем - пухăнчĕç.
Çак чаплă мероприятие çулсеренех «Чăваш Республикинчи хĕрарăмсен канашĕ» общество организацийĕ ирттерет. Фестивалĕн пĕтĕмлетÿ тапхăрне хутшăниччен малтанхи тапхăрсенче жюри членĕсем хĕрарăмсем портфолионе хаклаççĕ, хĕрарăмсем хăйсем çинчен каласа панипе палашаççĕ. Çапла вара фестиваль хĕрарăмăн ĕç-хĕлĕ пурнăçри темĕн тĕрлĕ сферăпа çыхăннине кăтартса парать, хĕрарăмăн пĕлтерĕшне татах та хăпартать.
Амăшĕн кунне халалланă фестивале Муркашсем те пысăк ушкăнпа хутшăнчĕç. Район администрацийĕн пуçлăхĕн çумĕ Л. Тарасова ертсе пыракан хĕрарăмсен пирĕн районти канашĕ тата нумаях пулмасть йĕркеленнĕ ашшĕсен канашĕ «Солнышко» ача садĕнче вăй хуракан Ольга Петрова воспитателе пулăшу кÿме Шупашкара çитсе килчĕç.
Ольга Германовна - районти тата республикăри чылай конкурс çĕнтерÿçи. Кăçалхи ĕçсене кăна тишкерес пулсан та ÿсĕмсем нумай унăн: районта çулталăкри чи лайăх воспитатель пулчĕ, районти хĕрарăмсен «Ăнăçу» конкурсĕнче «Ылтăн чĕре» номинаци çĕнтерÿçи пулса тăчĕ, РФ Вĕренÿ тата наука министерствин Хисеп грамотине тивĕçрĕ... Пĕр сăмахпа каласан - маттур. Асăннă фестивальте вара Ольга Германовнăна «Ачасене воспитани парассинче традицисене упрасси» уйрăм номинацире палăртрĕç.
Хĕрарăмăн пĕлтерĕшне, тивĕçне палăртса каланă сăмах нумай пулчĕ фестивальте. Чăваш Республикин Пуçлăхĕ Михаил Игнатьев феситивале хутшăннă май республикăра нумай ачаллă çемьесене паракан социаллă пулăшу пирки те аса илтерчĕ. Сăмахран, федераци шайĕнчи тата республика шайĕнчи амăш капиталĕсем çитес çул пĕтĕмĕшле 530 пин тенкĕпе танлашĕç. Нумай ачаллă çемьесене паракан пулăшу та питĕ курăмлă. Фестивале хутшăнса хĕрарăмсене саламлакан арçын ертÿçĕсем хушшинче кăçал ĕçлеме тытăннă республикăри ашшĕсен канашĕн ертÿçи - хулари стоматологи поликлиникин тĕп врачĕ В. Викторов та пулчĕ.
Н. Николаева.
Источник: "Çĕнтерÿ ялавĕ"