01 февраля 2014 г.
Ыран - йĕлтĕр йĕрĕ çине
Ыран, февралĕн 2-мĕшĕнче, 11 сехетре «Йĕлтĕр йĕрĕ - 2014» массăллă ăмăртăва Муркашри йĕлтĕр базинче савăнăçлă лару-тăрура уçаççĕ.
Ăмăртăва спорта юратакан кашни çын хутшăнма пултарать. Çул ÿсĕмне кура кашниех тĕрлĕ дистанцире старта тухма пултарать - ачасенчен пуçласа ветерансем таранах. Çак ăмăртăва пирĕн районта çуралса ÿснĕ тĕнчипе палăрнă биатлонистка Татьяна Моисеева Олимп факелĕпе çитмелле.
Ветерансем канашларĕç
Январĕн 29-мĕшĕнче районти ветерансен канашĕн, ял хуçалăхĕнче ĕçленĕ ветерансен тата пенсионерсен пĕрлешĕвĕн вырăнти канашĕсем пĕрлехи ларăва пухăнчĕç. Асăннă канашсен ертÿçисем - М. Виноградова, В. Вязов тата А. Скворцов хăйсен сăмахĕнче иртнĕ çулхи ĕçсене пĕтĕмлетрĕç.
Ларура çак çул валли ĕç планĕсене çирĕплетрĕç. Вĕсене тишкерсен ветерансем кăçал пĕлтĕрхинчен активлăрах пурăнасси куç кĕрет, мĕншĕн тесен кăçал район 70 çул тултарнине тата Аслă Çĕнтерÿ тунăранпа 70 çул çитнине халалланă мероприятисем чылай ирттерме палăртса хунă. В. Вязов каланă тăрăх хальхи вăхăтра республикăра агропромышленность комплексĕнче вăй хунă ветерансен энциклопедине хатĕрлессипе хĕрÿ ĕç пырать. Çавна май Муркаш тăрăхĕнчи ветерансен списокне те тĕплĕн хатĕрлеççĕ.
Çĕнĕ çулта - çĕнĕлĕх
ЧР Сывлăх сыхлавĕпе социаллă аталану министерствин Муркашри халăха социаллă пулăшу паракан центрĕ халăха тĕрлĕ енлĕ пулăшу парать: реабилитациленмелли техника хатĕрĕсемпе тивĕçтернинчен пуçласа ватăсене килте пăхса тăни таранах. Центр ертÿçи О. Иванова центр ĕçне пĕтĕмлетме пухнă ларури докладран çакă уççăн курăнчĕ. О. Васильева пĕлтернĕ тăрăх центрăн малаллахи ĕçне çĕнĕлĕхсем те кĕртме палăртнă. Сăмахран, çулталăкăн иккĕмĕш кварталĕнчен пуçласа ĕçе участок принципĕпе пурнăçлама та тытăнаççĕ. Ку чи малтанах вырăнсенче социаллă ăнăçсăрлăха асăрхаттарассипе çыхăннă.
Центр ĕçне район администрацийĕн пуçлăхĕн çумĕ Л. Тарасова, Муркашри тĕп больницăн тĕп врачĕ В. Данилов, районти социаллă хÿтлĕх пайĕн ертÿçи В. Аникина тата ыттисем те хутшăнса центр ĕçне лайăх енчен палăртрĕç.
Пĕр шухăшлăн - пăр çине
Ярапайкасси ял тăрăхĕнчи Шуркассинче пурăнакан хĕрарăмсем каçсерен шейпинг занятийĕсене çÿрени пирки вулакансем пĕлеççĕ ĕнтĕ. Çак ялти арçынсен те тунсăхлама вăхăт çук: вĕсем ялти пĕве çинче хоккейла выляма килĕштереççĕ-мĕн. Кунта кунĕпех çын татăлмасть.
Шуркассисем уçă сывлăшри активлă кану сывлăх çине лайăх витĕм кÿнине палăртаççĕ. Ялта пурăнакансем вырăнти депутата Алим Андриянова пуçарулăхшăн тав сăмахĕ калаççĕ. Спорта юратакан, пуçаруллă та мал туртăмлă çыннăн шухăшĕпе ыттисем те килĕшни ял çыннисемшĕн усăллă кăна.
Вĕренÿри çивĕч ыйтусемпе
Районти шкулсенчи директорсен вĕренÿпе воспитани енĕпе ĕçлекен çумĕсем çак эрнере вĕрентÿ тытăмĕн актуаллă ыйтăвĕсене сÿтсе явнă.
Педагогсем «Раççей Федерацийĕнчи вĕренÿ çинчен» федераци саккунĕпе килĕшÿллĕн кашни шкулăн мониторинг модельне хатĕрлемелли çинчен, сывлăх тĕлĕшпе чикĕленнĕ тата инвалид ачасемпе психокоррекци ĕçне йĕркелесси çинчен тĕплĕн калаçнă.
9 тата 11 классенче вĕренекенсен экзамен тапхăрĕ пуçланиччен вăхăт нумаях юлмасть. Çавăнпа та ку темăпа та анлă калаçу пулнă. Пирĕн районта кăçал пĕрлехи патшалăх экзаменĕсене 200 çын тытмалла, вĕсен списокне ятарлă базăна кĕртнĕ ĕнтĕ.
Выставка ĕçлет
Калайкассинчи вăтам шкулта Афганистан Республикинчи çар операцийĕсене хутшăннă пирĕн салтаксен музейĕ ĕçлени республикипех паллă ĕнтĕ. Çамрăксене патриотизмла воспитани парасси çине асăннă шкулта уйрăмах пысăк тимлĕх уйăрнине çирĕплетсе тата асăннă вăрçăран пирĕн çарсене илсе тухнăранпа 25 çул çитнине халалласа иртнĕ кунсенче шкулта Афган вăрçин выставкине уçрĕç. Ăна курма пыракансем Афганистан фронтĕнчи сăн ÿкерчĕксемпе, пирĕн салтаксен тумтирĕпе, вĕсен çырăвĕсемпе паллашма пултараççĕ.
Н. Николаева хатĕрленĕ.