06 июля 2013 г.
Уйкас Янасал. Районти Акатуй уявĕ кăçал пултаруллă та хастар çĕр ĕçченĕсене Лантăш вăрманĕн уçланкине 60-мĕш хут пуçтарчĕ. Чи маттуррисем вара парнесене тивĕçрĕç. Вĕсем хушшинче вырăнти Ильич яч. хис. хуçалăх механизаторĕн Виталий Петровăн ячĕ те пур. Ăна та уяв сцени çине чĕнсех чысланă.
Уявра «чăваш урамĕнче» пулса курма интереслĕ пулнă. Кашни ял тăрăхĕ хăйĕн «кил-çуртне» хатĕрленĕ, хăнасене хăйсен çимĕçĕпе сăйланă. Уйкас Янасалсем çемье пурнăçне сăнланă. Уйрăмах Сосновка ялĕнче пурăнакан И. Макаровăн тĕрри-эрешĕсем çынсене тыткăнланă. Ахальтен мар ĕнтĕ ку ял тăрăхĕн кил-çурчĕ «Чăвашсен кил-çурчĕ» конкурса хутшăнса 2-мĕш степень Диплома тата хаклă парнене тивĕçнĕ.
Мăн Сĕнтĕр. Кашни яш-кĕрĕмшĕнех шкултан вĕренсе тухни палăрăмлă та пĕлтерĕшлĕ самант пулса тăрать. Кăçал 11-мĕш класран 29 яшпа хĕр вĕренсе тухнă. Вĕсенчен 2-шĕ шкула ылтăн, 3-шĕ кĕмĕл медальпе вĕçленĕ.
Шкулпа сыв пуллашасси пуриншĕн те пĕр савăнăçлă, тепĕр енчен тата кăшт хурлăхлă самант. Шкултан вĕренсе тухакансене район администрацийĕн вĕренÿ тата çамрăксен политикин пайĕн пуçлăхĕ З. Дипломатова, шкул директорĕ К. Спиридонов саламланă, пурнăçăн анлă çулĕ çинче ăнăçусем суннă.
Ильинка. Июнĕн 26 – 27-мĕшĕсенче Ильинка шкулĕн бази çинче шкулти «Волжанка» лагерьте канакансемпе тата Шупашкарти механикăпа технологи техникумĕн студенчĕсемпе пĕрле республикăри «Çамрăк сăн ÿкерекенĕн çуллахи шкулĕ» семинар иртнĕ. Занятисене техникум преподавателĕ А. Абрамов тата шкулти истори учителĕ И. Каргин ирттернĕ.
Семинар усăллă иртнĕ. Студентсем сăн ÿкерчĕксем нумай тунă, ачасем те хăйсемшĕн усăллине илме пултарнă.
; ; ;
Нумаях пулмасть Ильинкăра Атăл хĕрри Çармăс Республикинчи Горномарийски районĕнчи Кузнецовкăри, хамăр районти Мăн Сĕнтĕрти тата Ильинкăри шкулсенче вĕренекенсене пуçтарнă. Шкул ачисем уçă шывра çынсене çăлассипе регионсем хушшинчи нумай енлĕ команда кĕрешĕвĕнче вăй виçнĕ. Сумлă хăнасем, представительсем те чылай пулнă.
Ильинкăсен командинче Андрей Морозов, Стас Портнов, Кирилл Сеньков, Дарья Щеглова, Светлана Яртеева тата Снежана Пигенешева ăмăртнă. Ăмăртура вĕсем тивĕçлипех пĕрремĕш вырăн çĕнсе илме пултарнă. Мăн Сĕнтĕрсемпе çармăссен командисем хыççăнхи вырăнсене пайланă.
Оринин. Орининсем йăлана кĕнĕ Çветуй Троица кунне уявланă. Кунти чиркÿре ирхине кĕлĕ иртнĕ. Унтан уява та чиркÿ умĕнчех йĕркеленĕ. Уява Иннокентий атте, район администрацийĕн пуçлăхĕн çумĕ В. Никитин, депутатсен районти Пухăвĕн депутачĕ, ветерансен вырăнти канашĕн председателĕ В. Вязов, Перекет банкĕн уйрăмĕн хушма офисĕн заведующийĕ Ю. Иванов, «Оринино» хуçалăх ертÿçи Ю. Шишокин, Оринин шкулĕн директорĕ В. Иванов, чиркĕве юсакан инвесторсем хутшăннă. Лапкасри М. Игнатьев предприниматель ачасем валли батут туса панă. Муркаш тата Мăн Сĕнтĕр райповĕсен магазинĕсем, предпринимательсем хăйсен продукцине сĕннĕ.
Концерт программи пуян пулнă. Халăх пултарулăхĕн Орининти «Шуракăш», «Оринен», Мулкачкассинчи «Пучах» коллективсем уява пухăннисене ташă-юрă парнеленĕ.
Юнкă. Юнкă шкулĕн стадионĕнче авиамодельсен ăмăртăвĕнче «Сывлăшри çапăçу» енĕпе Чăваш Енре мала тухассишĕн ăмăртусем иртнĕ. Ăмăртусене тĕп судья – ЧР авиамодель спорчĕн федераци президенчĕ Н. Захаров хакланă.
Ăмăртусен пĕтĕмĕшле итогĕсем тăрăх Муркашсем 9-мĕш спартакиада шучĕпе 1-мĕш вырăна тивĕçнĕ, кубок çĕнсе илнĕ.
Июлĕн 9 – 16-мĕшĕсенче Ульяновскра Раççей ăмăртăвĕсем иртеççĕ. Унта Юнкă шкулĕнчен Л. Романовпа А. Тепеев хăйсен пултарулăхне кăтартĕç.
Ярапайкасси. Июнĕн 24-мĕшĕнче пĕтĕм халăхпа Республика кунне анлăн уявларăмăр. Çав кун Шупашкарта Чăваш патшалăх оперăпа балет театрĕ умĕнчи сцена çинче Чăваш Енри наципе культура пĕрлешĕвĕсен XII «Туслăх кăшăлĕ» фестивалĕ иртнĕ. Фестивале республикăран 11 коллектив, çавăн пекех халăх коллективĕсем Узбекистанран, Мордовирен, Çармăс Республикинчен, Пушкăрт Республикинчен, Ульяновск облаçĕнчен хутшăннă. Пĕтĕмĕшле 350 çын ытла.
Фестивале Ярапайкасси ял тăрăхĕнчи «Екрем» халăх фольклор ансамблĕ те хутшăнма тивĕçнĕ. Ярапайкассисем ăсталăхшăн, наци культурине пропагандăланăшăн тата халăхсем хушшинчи туслăха çирĕплетме тÿпе хывнăшăн уявран дипломпа таврăннă.
Ял тăрăхĕсен сайчĕсенчи материалсемпе усă курса
В. ШАПОШНИКОВ хатĕрленĕ.
Источник: "Çĕнтерÿ ялавĕ"