15 ноября 2012 г.
Эпĕ тĕрлĕ почтальонпа курса калаçнă. Анчах Муркаш районĕнчи Шурчари çыхăну уйрăмне ертсе пыракан Алена Антонова /çав вăхăтрах вăл почтальон тивĕçĕсене те пурнăçлать/ пек пултаруллă çынна тĕл пулман.
Алена Витальевна Вăрнар тăрăхĕнче йышлă ачаллă çемьере çитĕннĕ, Çĕпритун Шăпчăк сăвăç йăхĕнчен тухнă. Поэт унăн аслашшĕпе пĕр тăван иккен. Çавăнпах пулĕ Толмасовсен /Аленăн хĕр чухнехи хушамачĕ/ çемйинче поэзипе туслă. А.Антоновăн йăмăкĕ Татьяна пĕчĕклех сăвă, юптару хайлама ăста. Вăл та пичет тусĕ - Вăрнар районĕнчи Малти Ишекри почта уйрăмĕн пуçлăхĕ. Икĕ çул каялла Татьяна Витальевна республикăри почта ертÿçин конкурсĕнче çĕнтернĕ. Халĕ, кăкăр ачи пăхнă май, унăн тивĕçне мăшăрĕ Сергей Семенов пурнăçлать.
Алена Антоновăн упăшки Юрий Михайлович та пуçанăшĕпе пĕрешкел - хаçат-журнал салатасси хĕрарăм ĕçĕ тесе тăмасть. Пĕр вăхăт вăл почтальон пулнă. Штата пĕчĕклетнĕрен ĕçрен уйрăлма тивнĕ.
Юрий Антонов тăван килĕнчен уйрăлса тухса çĕнĕ çурт лартнă. Ăна хăтлăлатма, ытти çурт-хуралтă çĕклеме нухрат çителĕклĕ пухас тесе Мускава çÿрет. Таврăнсан тепĕр уйăх килти хуçалăха аталантарать, механизатор пулнăран вырăнти хуçалăхра ĕçлет, арăмне почтăра пулăшма та ĕлкĕрет. Мăшăрĕ ырă кăмăллă та ĕçчен. Куншăн Алена Витальевна савăнать çеç.
Шурчари çыхăну уйрăмĕ районта чи лайăххисен йышĕнче. 30 çула яхăн пичет кăларăмĕ, корреспонденци валеçекен Эльвира Соловьевăпа Алена Антонова иккĕшĕ пĕрле йышăннă тĕллевсене çулсерен ирттерсе пурнăçлаççĕ. Эльвира Васильевна пур яла та çитеймест паллах, çавăнпа та кăнтăрла иртсен почта пуçлăхĕ хаçат-журнал валеçме ялсем тăрăх хăй те çула тухать. Тăван чĕлхене юратни, сăвăсене чăвашла та, вырăсла та шăрçалани, çепĕç калаçни ăна халăхпа пĕр чĕлхе тупма пулăшать.
- Ăш пиллĕ те тарават пулнăран эпĕ унпа питĕ кăмăллă. Почтăна кĕрсен тухас та килмест, - мухтамасăр чăтаймарĕ Шурча культура çурчĕн илемлĕх ертÿçи Валерий Черкесов. - Алена Витальевна ял çыннисем «Хыпара» юратса вулаччăр тесе тăрăшать. Вăл - килсерен кĕтнĕ хăна.
Кĕтекенсем патне хăвăртрах çитесчĕ тесе хĕлле - йĕлтĕрпе, çулла велосипедпа çула çывăхлатать.
Антоновсем спортпа та туслă. Кашнин велосипед пур. Районта çу уйăхĕн 9-мĕшĕнче çулленех иртекен велочупăва йышпа хутшăнаççĕ. Пĕр çулхине Алена Витальевна, хĕрĕ Надежда хăйсен ушкăнĕнче финиша малтан çитнĕччĕ, Юрий Михайлович виççĕмĕш вырăн йышăннăччĕ.
Надежда вара пуринчен те ирттерет. Маунтинбайк енĕпе Раççей спорт мастерĕ, çĕр-шывăн пĕрлештернĕ командин членĕ. Тĕнчипе чапа тухнă Ирина Калентьева, Вера Андреева спортсменкăсемпе пĕрле тренировкăсене çÿрет. Ăсталăха РФ тава тивĕçлĕ тренерĕ В.Краснов патĕнче туптать.
А.Антонова - пултаруллă фотоăста та. Муркаш район администрацийĕн культура пайĕ ирттернĕ фотоконкурса хутшăнса Диплома тивĕçнĕ. Вăл унта 10 ĕç тăратнă, кашнине 4 йĕркеллĕ сăвă çаврăмĕпе пуянлатнă. Пурнăçри интереслĕ самантсене, çут çанталăк илемне сăнарласси - унăн киленĕçĕ, чун туртăмĕ.