21 января 2012 г.
-Ял культури библиотекăран пуçланать. Эпир вара хамăр тивěçе туллин пурнăçласа ялта пурăнакана пурнăç илемне туйма пулăшатпăр, - терěç эсир сăн ỹкечěкре куракан библиотекарьсем. Çапла каланинчен вěсем ял çыннин пурнăçне пур енлě культура пěлěвě кěртнине тата кěртме пулăшнине ăнланса илтěм. Малаллахи калаçу эпě йăнăшманнине çирěплетрě çеç. Сулахайран сылтăмалла эсир 23 çул Кашмашри ял библиотекине ертсе пыракан Ольга Алексеевна Семеновăна, Çатракассинчи ял вулавăшěнче 14 çул ěçлекен (библиотекарь стажě пěтěмпе 33çул) Вена Петровна Конузинăна, чěрěк ěмěр Очăкасси ял çыннисене кěнеке вулама чěнекен Римма Семеновна Илларионовăна куратăр. Хăйсен ěçěпе ял çыннисене пулăшу панине вěсем те, ялта пурăнакансем те кулленех курса тăраççě. Çавăнпах асăннă библиотекăсенчен ял çыннисем те, шкул ачисем те татăлмаççě.
-Кěнеке юратни библиотекăна туртса илчě. Кунти ěç те пěтěмпех ял хуçалăхěпе çыхăннă. Çавăнпа эпир хамăра çěр ěçченěсенчен пěрре те кайра тăмастпăр, - терě Ольга Алексеевна умри кěнеке çинчен куçне илсе.
Источник: "Çĕнтерÿ ялавĕ"