06 апреля 2011 г.

      Ялти  Культура çуртěнче черетлě мероприяти тесен чун темěн çěннинех сисмерě-ха. Анчах хамăр ялти артистсемех «Сăпка юрри» спектакль премьерипе ял сцени çине тухаççě тени илěртрě. Билет хакě те 20 тенкБилет хакě те 20 тенкě кăна. Ĕç кунě хыççăн кайса килме юрать тесе çемйипех ял артисчесен ěçěпе паллашма кайрăмăр. Малтанхи çăмăл шухăша паянчченех сивлетěп. Спектакль премьерипе паллашнă хыççăн манăн унти рольсенче ăста вылякан ялти хастарсене чăваш халăх ял артисчěсем тесе хаклас шухăш çуралчě. Кăна çак каç куракансен залне йышлă пухăннă çынсем те (кунашкалли тěрěссипе  тахçанах пулманччě) кашниех мана майлă йышăнчě пулě. Сцена çинче больницăри ача çуратмалли уйрăмра пулса иртекен ěçе нумайăшě алăран сăмса тутри ямасăр куççуль витěр пăхса ларчě.

      «Сăпка юрри» («Колыбельная») спектакле Т.Миннуллин сырнă, чăвашла Н.Митрофанова куçарнă. Ялти артистсен тăрăшулăхěпе, Чăваш халăх драма театрěн режиссерě Григорий Федоровăн маçтăрлăхěпе ăна пуш уйăхěн 28-мěшěче премьера шайěпе Кашмаш халăхě умне калăпласа кăларма пултарчěç. Режиссер та, артистсем те çак ěçе Театр куне халаллани чăнах та пысак уяв пулчě.

       Нумай ача амăшěн Людмилăн рольне ăста вылянă Роза Николаева, 29-30 çулсенчи ача амăшěсен-Светланăпа Валентина- ролěсене калăпланă Елена Тихоновăпа Тамара Цвыга, пěрремěш ача çуратнă тата ăна йышăнас мар шухăшлă Дилемма студентка рольне вылянă Алина Трофимова, 30 çулсенчи ятсăр хěрарăм ролěнче пулнă Ольга Семенова, Нина медсестра  (Наталия Ефремова), ача çуратакан уйрăмěн тухтăрěпе тěп врач Мария Ивановнăпа  Юрий Михайлович (Галинăпа Николай Ершовсем) çěр-шывра паянхи демографии лару- тăрăвěнче çирěп йěрке кирлине хăйсен ролěсенче питě уçăмлăн кăтартрěç. Людмила Светăпа Вальăна сăпка юрри юрлама вěрентнине илтнě Дилемма та кунсем иртнě май хăйěн усал шухăшне  пăрахăçлать. Анчах çак çěнтерỹ патне пымалли çул çинче чуна хумхантаракан мěн чуль истори… Кăна эсир Кашмаш халăх ял артисчěсен спектакльне пăхсан çес хак пама пултаратăр.

Источник: "Çĕнтерÿ ялавĕ"