15 августа 2007 г.
Çакнашкал пĕтĕмлетрĕç калаçăва «Восток» ял хуçалăх производство кооперативĕн комбайнерĕсем хăйсен юлнă вырма лаптăкĕ 100 гектартан катăлнине палăртса.
- Çулпа çул пĕр килмест теççĕ те, кăçал ăна хамăр куçсемпех куртăмăр. Вăхăтра акрăмăр, анчах нÿрĕк çителĕксĕр пулнипе çуртрисем ăнса пулаймарĕç. Апла пулин те акнă тырра пуçтарса илесех пулать.Ку вăл çĕр ĕçченĕн тĕп тивĕçĕ. Хуçалăх ертÿçисем туса панă ĕç условийĕсемпе килĕшÿллĕн кулленех ĕçе тухатпăр. Паянхи пекех пулсан тепĕр 3-4 кунтан вырмана вĕçлетпĕр, терĕ «хир карапне» пире курсан самантлăха чарнă Юрий Сергеевич Иванов комбайн çинчи тасамарлăха тасатнă май.
«Восток» хуçалăх комбайнерĕсене кăçалхи вырмара ырăпа Кăна палăртмалла. Акă саккăрмĕш вырмана хутшăнакан Юрий Иванов СК-5 «Нива» комбайнсемпе ĕçлекенсем хушшинче иртнĕ эрнери вырма ăмăртăвĕн кăтартăвĕсемпе районта иккĕмĕш вырăнта. Унăн ĕçтешĕ Василий Юрьевич Уткин – виççĕмĕш вырăнта.
Хуçалăхăн урпа пуссинче паян виçĕ «хир карапĕ» вырать. Техникăна киввине пăхмасăрах ĕçе тĕплĕ хатĕрленипе паян кшни комбайнер вырмара хастар.
Çак ответлă тапхăрта ĕçлекенсем çитсе пыманран хуçалăхăн тĕп инженерĕ Юрий Михайлов хиртен йĕтем çине тырă турттарать. Эпир пулнă куна унăн кăтартăвĕ 256 тоннăччĕ.
«Хир карапĕсем» юлашки гектарсем çинче вырма ирттереççă пулсан, механизациленĕ Звено улăма пуçтарассипе те вĕсенчен питĕ кая юлса пымасть. Хыçрах вара «хурçă утсем» çĕртме сухи тăваççĕ. Хуçалăхра кĕр аки ирттерме те çĕрсем хатĕрпе пĕрех. Кĕçех унта ака агрекгачĕсем тухĕç. Çакнашкал ÿкерчĕк паян Мулкачкассинче.
Источник: "Çĕнтерÿ ялавĕ"