08 мая 2007 г.
РФ Патшалăх Думинче пулса куртăмăр.
Республикăри пур хуласемпе районсенчи ветерансен канашĕсен представителĕсем те апрелĕн 20-мĕшĕнче Мускавра пулса курчĕç. Ку çул çÿреве «Çав аслă çулсем умĕнче пуç таяр» акцие хутшăнса Раççей Патшалăх Думин депутачĕсен, «Пĕрлĕхлĕ Раççей» («Единая Россия») фракци членĕсен Павел Семеновпа Константин Косачев пуçарăвĕпе йĕркеленĕ. Аслă Çĕнтерÿ уявĕ умĕнхи çак çул çÿреве пирĕн районтан Орининта пурăнакан Николай Якимович Васильев хутшăнчĕ. Çул çÿрев епле иртни пирки эпир ăна хăйĕн шухăш-кăмăлне пĕлтерме ыйтрăмăр.
- Раççей тĕп хули çĕнтерÿçĕсене çурхи ăшă кăмăл-туйăмпа кĕтсе илчĕ. Программа пуян та интереслĕ пулчĕ, Патшалăх Думинче, Поклоннăй сăрт çинче, Аслă Отечественнăй вăрçă музейĕнче тата ытти паллă вырăнсенче пуласси, Александровски садра паллă мар салтак вил тăпри çине чечексем хурасси т. ыт. те.
Патшалăх Думинче пулни çинче уйрăммăн чарăнса тăрас килет. Чăваш Республикинчен килнĕ ветерансен канашĕсен представителĕсене Патшалăх Думин халăх хутшăнăвĕсен ĕçĕсен комитечĕн председателĕ К.И.Косачев, Федераци тата регионсен политикин ĕçĕсен комитечĕн членĕ П.В.Семенов кĕтсе илчĕç.
Пире пурне те пĕр хут усă курмалли пропусксем пачĕç. Çавра сĕтел хушшинче ветерансен ĕçĕсен комитечĕн председателĕпе Н.Д.Ковалевпа тата ытти ответлă çынсемпе усă калаçу пулса иртрĕ. Николай Дмитриевич Патшалăх Думинче ветерансем тĕлĕшпе мĕнле-мĕнле ĕçсем туса ирттерни пирки каласа пачĕ. «Еç ветеранĕ» знакпа ята халĕ мĕншĕн пама пăрахни пирки те чарăнса тăчĕ. Ку функци малашне патшалăх çинче мар. «Ĕç ветеранĕ» ят парассине республика Президенчĕпе Патшалăх Канашĕ татса параççĕ. Çавна пулах йышăннă саккунсемпе килĕшÿллĕн ветерансене çăмăллăхсемпе тивĕçтересси кирлĕ шайра мар.
Кунпа пĕрлех çăмăллăхсемпе усă курма тивĕçлĕ çынсене эмелсемпе тивĕçтерессинче те йĕрке кирлĕ. Кун пирки те калаçу пулчĕ.
Юлашки вăхăтра ветерансене «Ока» çăмăл автомашинăпа тивĕçтересси йĕркеллĕ пулса пыманни пирки сăмах хускатрăмăр. Ку ыйтăва татса парассипе çывăх вăхăтрах йĕрке тума шантарчĕç. Комиссипе пăхса тухса автомашина илме тивĕçлĕ тесе палăртнă çынна май пулмасан укçан саплаштарасси пирки те ыйту пулчĕ.
Ветерансене пурăнма кирлĕ условисем туса парасси пирки сăмах хускатакансем пулчĕç. Вăрçă инваличĕсене çурт-йĕрпе чи малтан тивĕçтермелле.
Патшалăх Думин ларăвне кĕске вăхăтлăха хутшăнтăмăр. Ларăва вăрçă тата çар службин ветеранĕсен Чăваш регион организацийĕн председателĕ Н.Г.Морозов ертсе пычĕ. Пирĕн делегацийе зала чĕнсен вăл депутатсене Чăваш Республикинчи ветерансен ушкăнĕ саламлать тесе пĕлтерчĕ. Ветерансене тăвăллăн алă çупса кĕтсе илчĕç.
Ларусен залĕ çавра формăллă. Дума депутачесем йышлах марччĕ. Часах кăнтăр апачĕн вăхăчĕ пулмаллаччĕ. Пĕтĕмпе те 70 яхăн депутат кăначчĕ. Ларусене пурте йĕркеллех çÿремен пек туйăнчĕ. Сасăланă чух та хăшĕ-пĕри темиçе депутатшăн сасăлать пулас. Кнопкăсем пусса çÿреççĕ, сасăсем хушаççĕ пулмалла. Пĕрмай ларусенче ларса ывăнса çитнĕ пек курăнать.
Кăнтăрла иртни 2 сехетре пире кăнтăр апачĕ çитерчĕç. Хыççăн виççĕмĕш хута анса çитрĕмĕр. Унта пире П.В.Семеновпа К.И.Косачев тата тепĕр хĕрарăм, бюджет ыйтăвĕсемпе ĕçлекенскер, йышăнчĕç, тĕрлĕ ыйтусем пирки ăнлантарчĕç.
Республикăран пынă ветерансем чылай ыйтусем хускатрĕç. Ветерансен пурнăç условийĕсене çăмăллатмалли мелсем шырасси, çавна вали укçа-тенкĕ тупасси пирки чарăнса тăчĕç. Пĕр сăмахпа каласан, калаçу хĕрÿ иртрĕ.
Ветерансенчен чылайăшĕ вырăнсенчи ветерансенчен накзсемпе ыйтусем илсе килĕ. Ку çырусене вĕсем парса хăварчĕç. Эпĕ вара П.В.Семенова Мулкачкассинче асфальт çул тума пулăшнăшăн тав сăмахĕ каларăм. Чăннипех вăл хăйĕн сăмахне тытрĕ.
Кайран эпир Поклоннăй сăрт çинче Аслă Отечественнăй вăрçăн тĕп музейĕнче пултăмăр. Кунта тĕрлĕ çар техникине нумай пухнă. Пирĕннисен те, нимĕçсен те сахал мар. Тĕрлĕ вырăнсенче пулса Мускав хулипе, посольствăсемпе, «Москинопа», Мускав патшалăх университечĕпе паллашрăмăр, стадионсенче пултăмăр.
Юлашкинчен вара Хусан вокзалĕнчен «Чувашия» поездпа Шупашкара, тăван вырăнсене çул тытрăмăр.
Çакăн пек çул çÿрев йĕркеленĕшĕн, ветерансене Мускава кайса килме майсем туса панăшăн РФ Патшалăх Думине, Чăваш Республикинчен суйланă депутатсене, «Пĕрлĕхлĕ Раççей» фракци членĕсене Павел Семеновпа Константин Косачева пысăк тав сăмахĕ калас килет. Май килнипе усă курса вара ветерансене, тыл ĕçченĕсене, пĕтĕм Муркаш районĕн çыннисене çитсе килекен Аслă Çĕнтерÿ уявĕ ячĕпе чĕререн саламлатăп, ырлăх-сывлăх та ăнăçусем сунатăп.
Вăрçă ветеранĕ Н.Я.Васильев
Источник: "Çĕнтерÿ ялавĕ"