19 марта 2007 г.
.
Орининти пĕтĕмĕшле пĕлÿ паракан вăтам шкулта кăрлач уйăхĕн 30-мĕшĕнче иртнĕ уçă алăк кунне пирĕн патăмăра попечительсен канашĕн ертуçипе членĕсем, Оринин ял тăрăхĕн депутачĕсем, шкулти тата классенчи ашшĕ-амăшĕсен комитечĕсен членĕсем, районти депутатсен Пухăвĕн депутачĕсем В. Вязовпа В. Калинин, районти вĕрентÿ пайĕпе милицин çамрăксемпе ĕçлекен уйрăмĕн специалисчĕсем пухăнчĕç. Вĕсем математика вĕрентекен Т.П.Алексеева, информатика пĕлĕвĕ паракан Т.В Шерстякова, акăлчан чĕлхи вĕрентекен Т.Н.Михайлова тата пуçламăш классен учительници Ф.П.Александрова ирттерекен уроксенче пулчĕç, вĕсен пултарулăхĕпе паллашса ачасен аталанăвне хакларĕç, кĕçĕн классен «Савăнăçлă ăмăрту» вăййине пăхрĕç. Шкулти краеведени музейĕн членĕсем хăнасене тăван ен историйĕпе пухнă материалсемпе паллаштарчĕс. Хăнасем ачасен ĕç урокĕсенче тата алĕç кружокĕсенче бисерпа çыхнă ĕçĕсемпе кăмăллă юлчĕç, чустаран пĕçернĕ çимĕçсенчен тĕлĕнмеллипех тĕленчĕç.
Петĕр Хусанкай çуралнăранпа 100 çул çитнине халалланă уяв концерчĕ те уçă алăк кунне хăйне евĕр илем кÿчĕ.
Уçă алăк кунне вĕçлесе хăнасемпе шкул ĕçченĕсем çавра сĕтел ирттерчĕç. Унта шкул директорĕ В.Г.Иванов паян умра тăракан ыйтусене общественноçпа пĕрле кăна татса пама май пуррине палăртрĕ, шкулăн умри тĕллевĕсемпе паллаштарчĕ.
Елена Елизарова
Источник: "Çĕнтерÿ ялавĕ"