17 февраля 2007 г.
Килте те ĕçре те пĕрле.
«Восток» хуçалăхри Мулкачкассинчи сĕт-çу фермин коллективĕ те кÿршĕллĕ Орининсенчен юлмарĕ. Çак икĕ хуçалăха пĕр тăван Шишокинсем ертсе пыраççĕ пулсан, кăтартăвĕ те уйрăлсах тăмаллах мар ĕнтĕ. Ку вара, чăн та, çаплах. Мулкачкассинчи ферма хĕрĕсем иртнĕ çул кашни ĕнерен вăтамран 4 пин килограмм ытла сĕт сурĕç. Анфиса Михайловна Наумован кăтарту 4354 килогрампа танлашрĕ, Регина Александровна Бычкован – 4194 килогрампа. Иккĕшĕ те малтан хулара санитаркăра ĕçленĕскерсем, пĕр тĕрлĕ шур халата тепĕр тĕрлипе улăштарнăшăн ÿпкелешмеççĕ. Анфиса Михайловнан мăшăрĕ Валериан Иванович та – дояр. Аслă ывăлĕ вара Сергей механизатор ĕçне суйларĕ, пĕлтĕр ЧР Президенчĕн стипендине илме тивĕç пулчĕ. Регина Александровнан мăшăрĕ те Валерий Владимирович фермăрах ĕçлет.
Тепĕр чух халăхра çапла каланине илтме пулать: мăшăрсен пĕр çĕрте ĕçлени кирлех мар пулĕ. Çак сăмахсем чăнлăхпа пĕр килменнине Мулкачкассинчи фермăра ĕçлекен мăшăрсем ырă тĕслĕхпе çирĕплетсе параççĕ. Ĕçре вĕсен ĕç кал-кал пырать пулсан, килте те пĕр-пĕринпе шăкăл-шăкăл пурăнни пирки пĕр иккĕленÿ те çук. Унсăрăн ĕç ăнман пулĕччĕ.
Источник: "Çĕнтерÿ ялавĕ"