17 февраля 2007 г.
Çитĕнÿ ĕçлемесĕр килмест.
«Оринино» хуçалăхри Патаккассинчи ĕне ферминче иртнĕ çул кашни ĕнерен 4120 килограмм сĕт сурĕç. кунта 23 çул ĕçлекен Галина Пантелеймоновна Ковалевапа 35 çул вăй хуракан Тамара Артемьевна Арапкина вара кăтартăва 4429 килограма çитерчĕç. Галина Пантелеймоновна иртнĕ çул ĕне сăвакансен районти конкурсĕнче çĕнтерчĕ. Кун пек çитĕнÿсем ун çак хушăра пĕрре кăна мар пулнă. Республика шайĕнче те. Çуллахи каникулта шкулта чухнех фермăра амăшĕпе танах ĕçлетчĕ. 10 класс хыççăн нумай шухăшласа тăмарĕ – фермăна юлчĕ. Амăшне кура хĕре те çак çула суйлама шутларĕ: Вăрнарти совхоз-техникумра вĕренет.
Ку коллективра пурĕ пĕлтĕр 4-ăн 4 пинлĕ чикĕрен каçнă. Паян кашни ĕнерен вăтамран 15 килограмм сĕт сăваççĕ.
Хуçалăхĕпе илсен, мăйракаллă шултра выльăхсем пĕлтĕр талăкра вăтамран 672 грамм ÿт хушнă пулсан, Орининти вăкăр ферминче кăтарту – 878 грамм. Уйрăммăн илсен, самăртмалли ушкăнра выльăхсем талăкра вăтамран 1132-шер грамм, çитĕнтермелли ушкăнра 574-шар грамм ÿт хушнă. Светлана Васильевна Вершкова иртнĕ çулхи пĕтĕмлетÿсемпе «Районти чи лайăх выльăх самăртакан» ята тивĕçрĕ. 20 çул хушши пуçтарăннă ĕç опычĕн пĕтĕмлетĕвĕ тесен те йăнăш мар пуль çакă. Икĕ ача çуратса ÿстерчĕ, пĕрре те ĕç пăрахман çак хушăра.
Выльăхсен продуктивлăхĕ вырăнти зооветспециалистсенчен те нумай килет. Орининти ветеринари участокĕн ертÿçи Валерий Нилович Шидиков ветеринари мероприятийĕсене вăхăтра тата тĕрĕс туса пыни пирки те пĕр иккĕленÿ те çук. Ахальтен мар ĕнтĕ вăл «2006 çулхи чи лайăх ветеринари ĕçченĕ» ята тивĕçрĕ.
Источник: "Çĕнтерÿ ялавĕ"