01 ноября 2006 г.
Ырă çул сана, призывник.
Салтака каякансене чыс туса ăсатассине Муркаш районĕн çар комиссариатĕнче ырă йăлана кĕртнĕ. Кĕрхи призыв вăхăтĕнче ку тăрăхри 47 каччă тăван çĕршыва хÿтĕлекенсен йышне кĕрĕ.
Иртнĕ Эрнере вĕсене Уйкас Янасал чиркĕвĕн пачăшки Иван атте инçе çула пехиллерĕ, кашнинех Çветтуй Александр Невскин пĕчĕк Турăшне парнелерĕ.
Çав кунах çамрăксем Оринин вăтам шкулĕнче пухăнчĕç.Кунти музейпе паллашнă хыççăн вĕсем Калашников автоматне салатса пухассипе, Кире пуканĕ Йăтассипе ăмăртрĕç. Пăшалтан тĕл персе Мефодий Мясников çĕнтерчĕ. Кире пуканне пуринчен те нумайрах Владимир Андреев çĕклерĕ. Мини-футбол вăййисем те хĕрÿ кĕрешÿре иртрĕç.Юнкă тăрăхĕнчи призывниксем пурне те парăнтарчĕç. Мечĕке пенальтирен тапса пулас салтаксен иккĕмĕш команди шкул ачисене виççĕмĕш вырăна хăварчĕ.
Район администрации пуçлăхĕн çумĕ В. Никитин, çар комиссарĕн ĕçĕсене пурнăçлакан Д. Захаров, вĕрентÿпе çамрăксен политикин тата физкультурăпа спорт пайĕнче ĕçлекен З. Дипломатова, Оринин ял тăрăхĕн ертÿçи А. Суриков, шкул директорĕ В. Иванов, Афганистанра хĕсметре тăнă П. Ботников, Г. Данилов çĕршывăн çĕнĕ хÿтĕлевçисене ăшшăн саламларĕç, ентешĕсен сумлă ятне çÿлте тытма, çар тивĕçне чыслăн пурнăçласа тăван кĕтесе сывă таврăнма ырă çул сунчĕç. Ашшĕ-амăшĕн, палах, хĕсметри ывăлĕн çырăвĕ пысăк парне пулĕ.
Шкул ачисем аслă пиччĕшĕсене илемлĕ юрă-ташăпа савăнтрачĕç. Район администрацийĕн парнисем те çара каякансен кăмăлне çĕклерĕç.
Л. Макарова
Источник: "Хыпар"