22 сентября 2012 г.
Орининсем çĕр улми кăларса пĕтерчĕç.
Районта тĕллĕн-тĕллĕн вырма та вĕçленмен-ха. Малашлăха пăхакан ял хуçалăх производство кооперативĕсемпе хресчен (фермер) хуçалăхĕсем вара паян уяр кунăн кашни сехечĕпе туллин усă курса ĕç вăйĕн ытларах пайне «иккĕмĕш çăкăр» кăларас ĕçе явăçтараççĕ.
Ял хуçалăх производство коопертивĕсемпе хресчен (фермер) хуçалăхĕсенче кăçал «иккĕмĕш çăкăр» пĕтĕмпе 1000 гектар йышăнать. Вырăнти ĕçсене оперативлă пурнăçланăран тата паянхи ĕçе ырана хăварманран «Оринино» ял хуçалăх производство кооперативĕ кăçал вырма ĕçĕсенче те малтисен шутĕнче пулнăскер иртнĕ кунсенче «иккĕмĕш çăкăр» кăларас ĕçе те вĕçлерĕ.
Орининсем кĕрхи ĕçсенче пĕр çын пек ĕçлени хуçалăх «иккĕмĕш çăкăра» юлашки гектарсем çинче кăларнă чух вĕсем патĕнче пулсан та алă тупанĕ çинчи пекех курăнчĕ.
- Ĕçрен хăрамасан йĕпе-сапара та йывăрлăхсене çĕнме пулнине хамăр ĕçсене пĕтĕмлетнипе те çирĕплетейретпĕр, - терĕ МТЗ-82 тракторпа копалка кăкарса çĕр улми кăларакан Вячеслав Замков механизатор. Тракторист удостоверенине 1971 çулта илнĕскер хыçа юлнă 41 çул хушшинче миçе гектар çĕр улми кăларнă-ши; Ку ыйту çине нумай тесе хуравларĕ çеç Вячеслав Николаевич.
Ĕлĕкрех çĕр улми пуссисем пысăкрахчĕ. Ĕçлекенĕсем те ытларахчĕ. Ĕç вăйĕ сахалланнипех кăçал 20 гектар ытларах çеç çĕр улми лартрăмăр. Юрать Орининти, Муркашри, Москакассинчи вăтам тата Атапайри тĕп шкулсенчи аслă классенче вĕренекенсем пысăк пулăшу пачĕç. Пĕрлехи тăрăшулăхпа кĕске вăхăтрах çĕр улми кăларса пĕтертĕмĕр, - калаçăва хутшăнчĕ В. Замковăн механизатор династине малалла тăсакан ывăлĕ Валерий.
Хирте михĕсене пуçтарнă «иккĕмĕш çăкăра» Н.Волков, В.Ботников, С.Иванов, М.Колбасов, В.Колбасов, И.Ершов водительсем çийĕнчех пусăсене турттарса тăчĕç. Кунта вара çĕр улми тиекенсем те ырă сăмаха тивĕç.
- Ялта пурăнакан çăмăл ĕç мĕнне пĕлмест. Вырма вĕçлерĕмĕр, çĕр улми хирĕ те пушанать. Уяр кунăн кашни сехечĕ шутра. Ĕçсене вĕçлесен кану пулĕ те. Çакна ăнланса ĕçлетпĕр паян, - терĕ çĕр улми миххисене автомашина çине тиенĕ хушăра В.Васильев.
Источник: "Çĕнтерÿ ялавĕ"