22 марта 2007 г.
Муркашсем йĕлтĕр спортне чăннипех хисеплени, вĕсем тĕрлĕ ăмăртăва пысăк йышпа хутшăнни тахçантанпах паллă. Çакна иртнĕ шăмат кун Район центрĕнчи черетлĕ ăмăрту та тепĕр хут çирĕплетрĕ. «Пине яхăн йĕлтĕрçĕ пухăнчĕ паян», - пĕлтерчĕ тĕп судья Михаил Романов спорт мастерĕ.
Социализмлă Ĕç геройĕ Е.Андреев ячĕпе хисепленекен кубока çĕнсе илессишĕн йĕлтĕрçĕсем пирвайхи хут 1980 çулта ăмăртнă. Унтанпа йăлана кĕнĕ стартсен пĕлтерĕшĕ чакмасть. «Ентешсем манăн аттене хисеплени, унăн пархатарне сума суни савăнтарать пире», - терĕ тăванĕсен ячĕпе чапа тухнă колхоз председатĕлĕн хĕрĕ Валентина Евтихеевна хăйĕн саламлă сăмахĕнче. Вăл тата район администрацийĕн пуçлахĕ Ю.Иванов, Чăваш Патшалăх Канашĕн депутачĕ В.Данилов спортсменсене пурне те ăнăçу сунчĕç.
Илемлĕ вырăнта, лайăх çанталăкра чылая тăсăлчĕ çивĕч кĕрешÿ. Шкул ачисем те, вăсен ашшĕ-амăшĕ те хăйсен ушкăнĕсенче вăй виçрĕç. Уйрăммăн ăмăртса та, эстафетăсенче те. кăтартусене пĕтĕмлетсен çакă паллă пулчĕ. Е.Андреев кубокĕсене Сыпайри тулли мар тата Калайкасинчи вăтам шкулсен, «Волга» тулли мар яваплă обществăн командисем çĕнсе илчĕç.
Ăмăртăвăн тепĕр пайĕнче кĕрешÿ район администраци пуçлăхĕн кубокĕсемшĕн пычĕ. Тĕрлĕ организацин, учрежденин, предприятин, ял тăрăхĕн командисенче хăшпĕр ертÿçĕ те йĕлтĕр йĕрĕ çине тăчĕ. «Сăмахпа хавхалантарса тăни кăна çителĕксĕр», - терĕç вĕсем. Эстафета командисем тĕрлĕ ушкăнра ăмăртрĕç. Пĕри те ÿрĕк-сÿрĕк пуласшăн марчĕ, анчах та хисеплĕ Кубока финиша чи малтан çитнисене кăна параççĕçке. Çакнашкал чи «телейлисем» Çатракасси вăтам шкулĕн вĕрентекенĕсем, районти шалти ĕçсен пайĕнче тата «Моргаушсрайбыт» предприятире ĕçлекенсем пулчĕç. Çĕнтерÿçĕ-командăсене кубоксем, телевизорсем, уйрăм спортсменсене медальсем парса чысларĕç.
Источник: "Хыпар"