14 марта 2007 г.
Муркашри «Визит» суту-илÿ çурчĕ» чикĕллĕ яваплăхă обществăн директорĕ Л.В.Николаева Мускав хулинчен ырă хыпар илсе килчĕ. Унпа тĕплĕнрех паллаштарас тесе Лилия Валерьевнана хаçат редакцине хăнана чĕнтĕмĕр.
- Эпĕ Республикăра иртнĕ пултаруллă хĕрарăмсен конкурсĕнче «Чи шанчăклă партнер» номинацире мала тухрăм, Раççей шайĕнче иртекен конкурсра хутшăнма тивĕçрĕм.
Раççейри хĕрарăм – предпринимательсен ассоциацийĕ йĕркеленĕ «Çулталăкри çамрăк директор» конкурса 42 регион хутшăнчĕ. Конкурс программи пуян та интереслĕ пулчĕ. Кăçалхипе вăл вуннăмĕш хут иртрĕ. Эпир хамăрпа пĕрлĕ Шупашкарти 19-мĕш шкулăн фольклор ушкăнне илсе кайрăмăр.
2007 çул вырăс чĕлхин çулталăкĕ пулнă май, конкурса Пушкин балĕнче йĕркелерĕç. Çавăнпа та вилĕмсĕр поэтăн произведенийĕсене, вăл вăхăтри тĕрлĕ ташăсене çĕнĕрен аса илчĕç. Апла пулсан пултаруллă хĕрарăмсемшĕн виçĕ кунлăх ĕçлĕ çул çÿрев чылайччен асра юлĕ.
Паллах, конкурс çĕнтерÿçĕсĕр пулмасть. Эпир вара пĕрремĕш вырăна тухма пултартăмăр. Кил хуçисене, Мускавсене, виççĕмĕш вырăна хăвартăмăр. Чăваш Республикин Президенчĕ Н.В.Федоров валли «Служу Отечеству» орден парса ячĕç. Ку пирĕншĕн пысăк чыс пулчĕ. Ытти регионсен ертÿçисем валли тав хучĕсем пулчĕç.
Эпĕ Мускав хулинчен Пĕтĕм Раççейри «Çулталăкри çамрăк директор конкурс çĕнтерÿçи» медаль, Раççейри хĕрарăм-предпринимательсен ассоциацийĕн Президенчĕ Татьяна Георгиевна Малютина алă пуснă диплома тата журналсемпе каталогсем илсе килтĕм.
Источник: "Çĕнтерÿ ялавĕ"